ЕТТБнинг билдиришича, Анди Аранитас Алкис Дракиноснинг ўрнини эгаллайди. Алкис Дракинос банкнинг Тбилисидаги Кавказ ваколатхонаси директорлигига тайинланган. ЕТТБ Ўзбекистондаги фаолиятини 2017 йилда қайта тиклаганидан бери ваколатхонага Дракинос раҳбарлик қилиб келаётган эди.
Янги лавозимга тайинлангунига қадар Анди Аранитас ЕТТБнинг Шимолий Македониядаги ваколатхонасини бошқариб келган. Бунга қадар у ЕТТБнинг энергетика бўлимида юқори лавозимларда ишлаган. У Туркия ва Жануби-шарқий Европадаги энергия лойиҳаларини бошқаришга масъул бўлган.
Ўзбекистон Европа тикланиш ва тараққиёт банкига 1992 йилда аъзо бўлган. Банк 2003 йилдан бошлаб Ўзбекистонга кредит ажратишни камайтирган эди. Ўшанда Тошкентда бўлиб ўтган ЕТТБ саммитида банк раҳбарияти Ўзбекистонни авторитарлик, иқтисодий ислоҳотларга риоя этмаслик, сўз эркинлигини бўғиш ва қамоқхоналарда систематик қийноқларни қўллашда айблаганди.
2005 йил майида Андижонда юз берган қонли воқеалар ҳам муносабатларни янада совуқлаштирди. 2010 йилда ЕТТБ мамлакатдаги лойиҳалар учун кредит маблағлари ажратишни бутунлай тўхтатганди.
ЕТТБ 2017 йил ноябрида Ўзбекистондаги фаолиятини қайта тиклади ва Тошкентда яна ўз ваколатхонасини очди.
Шу кунгача ЕТТБ Ўзбекистонга 144 та лойиҳа доирасида 4,37 миллиард евродан ортиқ сармоя киритди.
Европа тикланиш ва тараққиёт банки (ЕТТБ)нинг Ўзбекистондаги ваколатхонаси директори лавозимига Албания ва Британия фуқароси бўлган Анди Аранитас тайинланди. У Тошкентдаги фаолиятини 1 сентябрдан бошлайди.