МБ ҳисоботида қайд этилишича, 2023 йилнинг январь-июнь ойларида банкларга нақд пул тушумлари 2022 йилнинг шу даврига нисбатан 19,8 фоизга ўсиб, 182,4 триллион сўмни ташкил қилган.
Марказий банк жорийнинг йилнинг дастлабки олти ойида банк кассаларидан (шу жумладан, банкоматлардан ҳам) берилган нақд пуллар ўтган йилнинг шу даврига нисбатан 14,2 фоизга кўпайиб, 187,3 триллион сўмни ташкил қилганини қайд этган.
“Банкларга тушган нақд пулларнинг уларга бўлган талабдан кам қисми Марказий банк томонидан муомалага қўшимча нақд пулларни чиқариш орқали таъминлаб борилди”, дейилган МБ ҳисоботида.
Ҳисоботдан келиб чиқилса, ўтган олти ой ичида Марказий банк томонидан қўшимча 6 триллион сўм нақд пул муомалага чиқарилган.
Регулятор жорий йилнинг 1 июль ҳолатига нақд пулларнинг умумий пул массасидаги улуши 24,8 фоизни ташкил этганини урғулаган.
Ҳисоботда биринчи ярим йилликда банк карталарига кирим қилинган маблағлар (359,2 триллион сўм) ўтган йилнинг шу даврига нисбатан 1,6 баравар ошгани, бу даврда банк карталаридаги 86,4 триллион сўм маблағ нақдлаштириб олингани қўшимча қилинган.
Жорий йилнинг биринчи ярмида Ўзбекистонда нақд пул банклар орқали нақд пул айланмаси ҳажми 369,7 триллион сўмни ташкил этган. Бу ўтган йилнинг шу даврига нисбатан 16,9 фоизга кўпдир. Бу ҳақда Марказий банкнинг 12 июль куни эълон қилинган ҳисоботида айтилган.