Россия расмийлари операциянинг биринчи босқичи жорий йилнинг 19-25 июнь кунлари олиб борилган, дейишса, муҳожирлар ҳибслар шу кунгача ҳам давом этаётганидан шикоят қилмоқда.
Россия Ички ишлар вазирлиги муҳожирларни ушбу мамлакат ҳудудида ноқонуний бўлиш, наркотик моддалар савдоси, қурол-яроғ савдоси ва чегарани ноқонуний кесиб ўтишда айблади.
Россия Ички ишлар вазирлигининг расмий вакили Ирина Волкга кўра, хорижий фуқароларга нисбатан Россия Федерациясидан маъмурий чиқариб юбориш ва депортация қилиш бўйича 7 мингга яқин қарор қабул қилинган. Ноқонуний миграцияни ташкил этиш, гиёҳвандлик воситалари ва психотроп моддаларнинг ноқонуний муомаласи, қурол-яроғнинг ноқонуний муомаласи ва давлат чегарасини ноқонуний кесиб ўтиш ҳолатлари бўйича 2 мингдан ортиқ жиноят иши қўзғатилган. Федерал ва халқаро қидирувда бўлган 273 нафар шахс аниқланган.
Унинг сўзларига кўра, операция давомида 45 мингга яқин миграция қоидабузарликлари, жумладан, 33 мингдан ортиқ хорижликларнинг Россия ҳудудига кириши, чиқиши, транзити ва бўлиши қоидалари бузилганлиги аниқланган. Бундан ташқари, операция иштирокчилари томонидан хорижликларнинг меҳнат фаолиятини амалга ошириш тартибининг 12 мингдан ортиқ бузилиши қайд этилган.
Россия ҳуқуқ-тартибот идоралари бу мамлакатда ноқонуний миграцияга қарши кампания давом этишини маълум қилди. Шу билан бирга, Давлат Думаси Россиядаги муҳожирлар учун қоидаларни кучайтиришни таклиф қилмоқда.