Бу билан Россия беш ой ичида Ўзбекистонда очилган қўшма корхоналар сони бўйича етакчилик қилмоқда. Россиядан кейинги ўринларни Хитой (245), Туркия (121) ва Қозоғистон (780) эгаллаган. Бу ҳақда Статистика агентлиги маълум қилди.
Агентлик ҳисоботида қайд этилишича, 2023 йил 1 июнь ҳолатига кўра, Ўзбекистонда фаолият юритаётган хорижий капитал иштирокидаги корхона ва ташкилотлар сони 12 807 тани ташкил этган. Улардан 2 884 таси Россия, 1 823 таси Хитой, 1 771 таси Туркия ва 957 таси Қозоғистон капитали ҳисобига очилган.
Айни пайтда январь-май ойларида Ўзбекистон ташқи савдо айланмаси 25,8 миллиард доллар бўлди. Унинг 4,5 миллиарди Хитой ва 3,8 миллиарди Россия ҳиссасига тўғри келади. Учинчи ўринда эса 1,9 миллиард долларлик кўрсаткич билан Қозоғистон бормоқда.
Россия январь-май ойларида Ўзбекистон импортида Хитойдан (3,7 млрд доллар) кейинги иккинчи ўринда (2,8 млрд доллар) бормоқда. Ўзбекистон экспортида эса Россия 986,3 млн долларлик улуш билан биринчи, Хитой 823 млн доллар билан иккинчи ва Қозоғистон 576,7 млн доллар билан учинчи поғонада бормоқда.
2022 йилнинг 24 февралида Россия Украинага бостириб кирганидан сўнг Ғарб давлатлари санкциялари остида қолди. Бунинг ортидан Ўзбекистонда Россия иштирокидаги корхоналар сони кўпайган.
Жорий йилнинг 25 апрель куни Ўзбекистон президенти Шавкат Мирзиёев Тошкентга “Иннопром. Марказий Осиё” халқаро саноат кўргазмасида иштирок этиш учун келган Россия бош вазири ўринбосари, саноат ва савдо вазири Денис Мантуров билан учрашган эди. Учрашув чоғида Шавкат Мирзиёев Ўзбекистон Россиянинг етакчи ишлаб чиқарувчилари билан саноат кооперациясини янада чуқурлаштириш муҳимлигини таъкидлаганди.
Шу билан бир қаторда Европа Иттифоқи сўнгги бир йилда Марказий Осиё давлатларидан Россияга экспортнинг 300 фоизга кўпайганидан ташвиш билдирган. Европа Иттифоқи фикрича, Россияга экспортнинг кескин кўпайиши Марказий Осиё давлатларининг Москвага санкцияларни четлаб ўтишга кўмаклашаётгани билан боғлиқ бўлиши эҳтимол.
Апрель ойида Европа Иттифоқининг санкциялар бўйича махсус вакили Дэвид О’Салливан Қирғизистон, Қозоғистон ва Ўзбекистонда бўлган эди. 27 апрелда Тошкентда матбуот анжумани ўтказган Дэвид О’Салливан Ўзбекистон ва ЕИ республика Россияга санкцияларни четлаб ўтувчи ҳудудга айланиб қолмаслиги йўналишида ҳамкорлик қилаётганини айтганди.
Жорий йилнинг январь-май ойларида Ўзбекистонда ташкил этилган хорижий капиталга эга бўлган 1279 та корхонадан 376 таси Россияга тегишлидир.