Чекловлар Россиянинг Украинага давом этаётган босқини туфайли киритилмоқда. Бунга оид қарорни Япония Вазирлар маҳкамаси июль ойида маъқуллайди, август ойидан эса қарор кучга киради.
Ўтган йилнинг апрель ойидан Япония Россияга қиймати 6 миллион иенадан ошган (тақрибан 43 минг доллар) ҳашамдор автомобиллар экспортини тақиқлаб қўйганди.
Уруш бошидан буён Япония бошқа мамлакатлар билан бир қаторда Россияга қарши ҳамда россиялик ва россияпараст сиёсатчилар, депутатлар ва мулозимларга қарши санкциялар жорий эта бошлаган. Жумладан, Токио Россияга вакциналар, тиббий жиҳозлар, атом объектлари ҳамда нефть ва табиий газ разведкаси учун ускуналар етказиб беришни тақиқланганди.
Япониянинг якка тартибдаги санкцияларига эса президент Владимир Путин, Россиядаги юқори лавозимли амалдорлар ва уларнинг яқинлари дучор бўлган. Шунингдек, Россия савдода имтиёзларга эга бўлган мамлакат мақомидан маҳрум бўлган. Айни пайтда Токио Украинага ҳарбий ва гуманитар ёрдам кўрсатини эълон қилган.
Ўз навбатида, Россия Японияни “дўст бўлмаган мамлакатлар” рўйхатига қўшган ҳамда Жанубий Курил оролларида қўшма хўжалик фаолиятини йўлга қўйиш бўйича Япония билан мулоқотдан чиқишини билдирган. Шу билан бирга, Россия япониялик балиқчиларнинг Жанубий Курил ороллари соҳилида балиқ тутишини тақиқлаб қўйган. Бундай ҳуқуқ уларга 1998 йили тузилган Россия-Япония битими асосида берилган эди.