Маҳаллий ОАВга кўра, Олий суд жорий йилнинг май ойида ёш қизнинг ўлдирилишида гумон қилинувчи шахсга нисбатан ноқонуний ҳукм чиқарилгани факти бўйича расмий текширув ўтказган. Натижада Туркистон вилояти Сариоғаш туман суди раисини эгаллаб турган лавозимидан озод қилиш масаласи кўтарилган.
13 июль куни Туркистон вилоятининг Сариоғаш туманида 5 ёшли қизалоқ ўлдириб кетилди. Тез орада гумондор қўлга олинди. Туркистон суди уни икки ойга ҳибсга олишга рухсат берди. 48 ёшли эркакка “қотиллик” ва “жинсий тажовуз” айбловлари қўйилди.
Хабар қилинишича, гумонланувчи аввалроқ 2006 йилда қотилликда айбланиб, 10 йилга озодликдан маҳрум этилган. 2023 йилнинг май ойида у жанжал оқибатида спиртли ичимлик ичиб, қишлоқдошини болта билан ургани учун судланган.
Гумонланувчининг жабрланувчи билан ярашгани, муқаддам судланганлиги олиб ташланганини инобатга олиб, судья унга пробацион назорат ўрнатган ҳолда уч йил муддатга озодликдан маҳрум қилиш жазосини тайинлади.