Расман билдирилишича, бир йилда Ўзбекистонда жон бошига 9,8 килодан гуруч истеъмол қилинади. Шундан келиб чиқилса, ўзбекистонликлар бир йилда 353 минг тонна гуруч ейди.
Вазирлик Ўзбекистонда йилига 310 минг тонна гуруч етиштирилишини, бу эса талаб қилинган эҳтиёждан 43 минг тоннага оз эканини таъкидлаган. Эҳтиёжни тўлиқ қоплаш учун 2023 йилнинг шу кунигача 53,5 минг тонна гуруч импорт қилинган.
Хабарда айтилишича, Ўзбекистонга гуручнинг 54, фоизи Қозоғистондан, 43,3 фоизи Покистондан олиб келинади. Ҳиндистоннинг улуши эса 0,2 фоизни ташкил қилади. Шундан келиб чиққан ҳолда, вазирлик гуруч қимматлаши учун асос йўқлигини иддао қилган.
Бир неча кун олдин гуруч экспорти бўйича жаҳонда етакчилик қилувчи Ҳиндистон вақтинча бу маҳсулотни хорижга сотишни тақиқлагани хабар қилинганди. Бунинг ортидан экспертлар жаҳон бозорида гуруч нархи қимматлашини башорат қилганлар. Ижтимоий тармоқларнинг ўзбек сегментида ҳам бу каби хабарлар тарқатилган эди.
Қишлоқ хўжалик вазирлиги гуруч нархи ошмаслигини иддао қилаётган бир паллада Ўзбекистон бозорларида бир кило гуруч навидан келиб чиқиб 11 500 сўмдан 25 минг сўмгача сотилаётгани айтилмоқда. Бу эса ўтган йилнинг мос даврига солиштирганда 35,2 фоизга қимматдир.
Қишлоқ хўжалик вазирлиги июнь ҳолатига кўра, бир кило гуручнинг жаҳон бозоридаги ўртача нархи 1,93 доллар, энг арзон нарх 0,52 доллар эканини билдирган.
Қишлоқ хўжалик вазирлиги Ҳиндистон гуруч экспортини тўхтатгани ортидан Ўзбекистонда бу маҳсулот тури қимматлаши тўғрисида тарқалган хабарларни фейк деб атади.