Қайд этилишича, Тошкент шаҳар судининг иш юритувига С.Р.П. (эркак, 1972 йилда Ҳиндистонда туғилган, «Қурамах Медисал» МЧЖ директори), С.К. (эркак, 1982 йилда Тошкент шаҳрида туғилган, бир вақтда Фармацевтика тармоғини ривожлантириш агентлиги директори ва унинг ҳузуридаги «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК директори лавозимларида ишлаган) ва бошқаларга (жами 21 киши: «Қурамах Медисал» МЧЖ ва «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК масъул ходимлари) оид жиноят иши келиб тушган.
Айбланувчиларнинг 16 нафари эркак ва 5 нафари аёл бўлиб, уларнинг 7 тасига «қамоққа олиш», 12 тасига «муносиб хулқ-атворда бўлиш тўғрисида тилхат» ва 2 тасига «гаров» тарзидаги эҳтиёт чоралари қўлланилган.
Аввалроқ Ўзбекистонда “Док-1 Макс” препаратини қабул қилгани ортидан 20 нафар бола вафот этгани, ҳолат бўйича ДХХ Тергов бошқармаси томонидан “Quramax Medikal” МЧЖ ҳамда “Дори воситаларини стандартлаштириш илмий маркази” масъул шахсларига нисбатан жиноят иши очилгани ҳақида Озодлик хабар қилган эди.
Reuters қайдича, болалар ўлимига сабаб бўлган Ҳиндистоннинг Marion Biotech ширкати ўз маҳсулотларини ишлаб чиқаришда фармацевтикада ишлатиш мумкин бўлмаган моддалардан фойдаланган.
Marion Biotech ўз сиропида ишлатилган пропиленгликоль (PG) моддасини Maya Chemtech India ширкатидан сотиб олган. Фармацевтика материалларини сотиш учун лицензияга эга бўлмаган мазкур ширкат вакиллари эса ўзлари сотган пропиленгликолни фақат саноат мақсадида ишлатиш мумкин бўлганини тан олишган.