Таъкидланишича, грин-карта ғолиби виза суҳбати учун сохта ҳужжатларни тақдим этгудек бўлса, унга нисбатан бир умрлик чеклов жорий этилиши мумкин.
“Ўзингизни, виза учун бир умрлик рад этилиш хавфи остида қолдирманг. Виза олиш учун мурожаат вақтида сохта ҳужжат ёки ёлғон маълумот тақдим этишни тавсия қилаётган учинчи шахсларга ишониб қолманг”, дейилади дипломатик ваколатхона баёнотида.
Ўзбекистонда АҚШга кўчиб бориб, янги ҳаёт бошлаш орзусида юрганлар сони йил сайин ошиб бораётгани кўриш мумкин.
Мамлакат бир неча йилдан буён Green Card учун энг кўп ҳужжат топшираётган давлатлар рўйхатида олдинги ўринларда.
2023 йилги грин-карта бўйича энг кўп ғолиб Миср (5529) ва Жазоирда (5526) қайд этилган. Ўзбекистон эса 5511 нафар ғолиб билан дунё бўйича рўйхатда учинчи ўринни эгаллаган.
Ўзбекистонда ҳар йили Green Card лотереяси ўйналаётган вақтда фирибгарларнинг фаоллашгани кузатилади.
АҚШ Давлат департаменти ариза топшириш бепул экани, пул эвазига ютуқ кафолатини бераётган шахсларга алданмаслик ҳақида огоҳлантириб келаётганига қарамай, аҳоли орасида фириб тузоғига тушганлар кўп учрайди.
Ариза тўлдиришда кўмак берган воситачи шахслар ютуқ чиққанда лотерея коди учун катта миқдорда пул талаб қилиши ҳолатлари ҳам қайд этилган.
1990 йилда асос солинган Green Card дастури доирасида ҳар йил қарийб 55 минг муҳожир АҚШда доимий яшаш ҳуқуқини қўлга киритади. Оқ уйнинг амалдаги раҳбари Жо Байден грин-карта ғолиблари сонини 80 мингтагача ошириш кераклигини айтган.
Таҳлилларга қараганда, кейинги вақтларда АҚШга Мексика орқали ноқонуний киришга уринаётган ўзбекистонликлар сони ҳам ошиб бормоқда. Жорий йил бошида АҚШ элчихонаси Мексика чегараси орқали ноқонуний киришга уриниш хатарли эканидан ҳам огоҳлантирган.
Ўзбекистон АҚШ визасини олиш кўрсаткичи борасида салбий тенденция кузатилаётган давлатлар сафига киради. Давлат департаменти ҳисоботига кўра, 2022 йилда АҚШнинг Тошкентдаги элчихонаси “B” тоифали визалар (сайёҳлик ва бизнес визалари) учун мурожаат қилган Ўзбекистон фуқароларининг 47,04 фоизига рад жавобини берган.
АҚШнинг Тошкентдаги элчихонаси Diversity Visa (Green Card) ғолиби бўлган ўзбекистонлик мурожаатчиларни виза олиш учун сохта ҳужжатлар тақдим этиш оқибатидан огоҳлантирди.