“Kun.uz” нашри рус матбуотига таяниб ёзишича, Шпаковский тумани Авиатор қишлоғида яшовчи пенсионер икки таниши билан бирга Россияда ноқонуний яшаб келган ўзбекистонлик 31 ёшли эркак ва 27 ёшли аёлни номаълум шахслардан 20 минг рублга сотиб олган.
Шу тариқа икки ўзбекистонлик ярим йил давомида деҳқончилик қилишга мажбурланган.
Россия ҳуқуқ идоралари ноқонуний озодликдан маҳрум қилиш фактини аниқлаб, икки кишини ҳибсга олган. Учинчи шахс июль ойи охирида вафот этгани маълум бўлган.
“Қонунга хилоф равишда озодликдан маҳрум қилиш” ва “ноқонуний миграцияни ташкил этиш” моддалари бўйича айбланаётган пенсионер тергов изоляторида, иккинчи гумонланувчи эса уй қамоғида.
Полиция ўзбекистонликларни қул қилиб сотган шахсларни қидираётгани айтилмоқда.
Озодлик Россияда одам савдоси қурбони бўлаётган ўзбекистонликлар тақдири ҳақида туркум дастурлар тайёрлаб келади. Қуллик шароитида ишлатилаётган муҳожирлар таҳририятга кўп бора шикоят йўллаган.
Россиянинг Ставрополь ўлкаси полицияси икки нафар ўзбекистонликни 6 ой давомида қул қилиб ишлатган шахсларни қўлга олди.