Модулнинг Ойга қўндирилиши Ҳиндистон коинот тадқиқотлари ташкилотининг Youtube каналида жонли намойиш этилди. Уни 6,5 миллион киши томоша қилди.
Ҳиндистон СССР, АҚШ ва Хитойдан кейин Ойга ўз аппаратини қўндира олган тўртинчи давлат, ўз аппаратини Ойнинг жанубий қутбига қўндирган биринчи давлат бўлди.
"Чандраян-3" Шрихарикот космодромидан 14 июль куни учирилган эди. У Ойга уч ҳафта ичида етиб борди. “Викрам” модули Ойда сейсмик фаолликни, тупроқни ва экзосферани тадқиқ этади. Бу ишлар бир Ой куни давом этади. Бир Ой куни 14,5 Ер кунига тенг.
Ҳиндистоннинг бундан аввалги Ойга модул қўндириш ҳаракати муваффақиятсиз якунланган эди. Ўшанда “Чандраян-2”станцияси томонидан коинотга олиб чиқилган “Викрам” модули парчаланиб кетганди.
10 август куни Роскосмос ҳам замонавий Россия тарихида илк маротаба Сибирдаги Восточний космодромидан Ойга “Луна-25” аппаратини учирганди. Бироқ у Ойга қўниш арафасида вайрон бўлган.
Ҳиндистоннинг “Чандраян-3” сайёралараро станцияси коинотга олиб чиққан “Викрам” модули муваффақиятли равишда Ой сатҳига қўндирилди. Модул бортига “Прагьян” ойюрари жойлаштирилган.