41 ёшли Рустем Умеров Ўзбекистоннинг Самарқанд вилоятидаги Булунғур туманида Қримдан депортация қилинган қримтатар оиласида туғилган. У қатор инвестиция жамғармаларида бошқарувчи директор бўлиб ишлаган. 2019 йилда у Олий рада депутатлигига сайланган. Умеров Россия қўшинлари 2022 йил февралида Украинага бостириб киргани ортидан Киевни тамсил этган музокара гуруҳи таркибида бўлган. Ўша йилнинг ўзида у Давлат мулк фондига раҳбар этиб тайинланган. Сешанба куни Украина парламенти уни аввалги лавозимларидан озод қилган.
Умеров куни кеча истеъфога келган Алексей Резников ўрнига келмоқда.
Президент Зеленский кадр алмашинуви зарур эканини изоҳлар экан, Резников 550 кундан кўпроқ давом этаётган уруш пайтида мудофаа вазири лавозимини эгаллаб турганини қайд этган. Зеленскийга кўра, вазирлик учун янгича ёндашувлар ва ҳам ҳарбийлар билан, ҳам жамоатчилик билан мулоқотнинг бошқа форматлари лозим.
Алексей Резников истеъфосига оид қарордан олдин армия учун давлат харидлари билан боғлиқ бир неча коррупцион можаролар кузатилган. Текширувлар мудофаа вазирининг ўринбосари дохил қатор юқори лавозимли мулозимларнинг ишдан бўшатилишига олиб келган.
Украина Олий радаси Рустем Умеровнинг мудофаа вазири лавозимига тайинланишини тасдиқлади. Мамлакат президенти Владимир Зеленский томонидан таклиф этилган Умеров номзодини ёқлаб 360 нафар депутатдан 338 таси овоз берган.