“Дўстлар, ва ниҳоят бизда яхши янгилик бор! Максим Галкиннинг Қозоғистондаги концертлари барибир бўлиб ўтади!”, деб ёзган продюсер ўзининг Facebook постида.
Остона ҳокимлигининг матбуот хизмати санъаткорнинг концерти 8 октябрь куни Марказий концертлар залида бўлиб ўтишини Озодлик қозоқ хизматига тасдиқлади. Ҳокимият, шунингдек, "аввал ҳам ҳеч қандай тақиқ бўлмаганини" таъкидлаган. Галкин танлаган санада Қозоғистон марказий концертлар залида Мураббийлар кунига бағишланган концерт режалаштирилган, шунинг учун март ойидаёқ унга бошқа кунни танлаш тавсия этилган. Ҳокимият айтишича, мана, деярли олти ой ўтгач, август ойининг охирида Галкиннинг вакиллари қайта ариза юборган ва бу ариза маъқулланган.
Озодликнинг саҳнадан сиёсий баёнотлар беришга қандайдир чекловлар бор-йўқлиги ҳақидаги саволига, ҳокимлик матбуот хизмати “ҳеч қандай чекловлар йўқ” деб жавоб берган.
Олмаота ҳокимлиги маданият бошқармаси бошлиғи Ғани Майлибоев ҳам Галкиннинг концерти Олмаотада 9 октябрь куни Республика саройида бўлиб ўтишини тасдиқлади. У ҳам аввалдан ҳеч қандай тақиқ бўлмаганини таъкидлаган. Остонадаги вазиятга ўхшаб, Олмаота ҳокимлиги ҳам дастлаб сўралган кунга саҳна банд бўлганини, концерт учун бошқа кун танлангач, ижозат берилганини иддао қилмоқда. "Иш режамиз олдиндан тузилган", дейди Ғани Майлибоев. Сиёсий баёнотлар борасидаги норасмий тақиқлар ҳақидаги саволга жавобан, Майлибоев "концерт бўлади, шартнома бор", деб қўя қолди.
Аввалроқ қизиқчи ва телебошловчи Максим Галкин бир неча ойдан бери Қозоғистонда концертларини ўтказишга рухсат ололмаётганидан шикоят қилган эди.
Галкиннинг сўзларига кўра, Қозоғистонда том маънодаги “давлат даражасида” Олмаота ва Остонадаги концертларига тўсқинлик қилинмоқда – унинг вакиллари доимо расмийларнинг қаршиликларига дуч келмоқда.
"Қандайдир сунъий сабаблар, саҳна ортидаги тақиқлар. Билетлар сотуви то бошланади, то тўхтатилади. Тушунишимча, негадир Қозоғистон расмийлари учун мен қўрқинчли шахсман, улар менинг концертларимни ўтказишдан жуда қўрқишади. Айни пайтда концертларимни ўтказишга норасмий тақиқ бор", - деди Галкин.
Унинг қўшимча қилишича, содир бўлаётган воқеадан Галкин афсусда, чунки Қозоғистон ва қозоқ томошабинларини “жуда севади”.
Максим Галкин Россиянинг Украинага босқини бошланганидан бери урушга қарши чиқиб келмоқда. У Россияни 2022 йилда тарк этди. Федерал телеканаллар унинг иштирокидаги рекламани бермай қўйдилар, Биринчи каналдаги «Сегодня вечером» дастури эфирдан олиб ташланди, ўзи эса "хориж агенти" сифатида тан олинди. Галкин ҳам ижтимоий тармоқларда, ҳам хорижда, шу жумладан Украина фойдасига, берилган концертларида бир неча бор урушга қарши гапирган.
Галкиннинг рафиқаси, совет халқ артисти Алла Пугачева эри билан бирга мамлакатни тарк этган ва расмийлардан уни ҳам хориж агенти сифатида тан олишни талаб қилди.
Қозоғистонда кейинги пайтда урушни қўллаб-қувватловчи россиялик санъаткорларнинг концертлари ҳам бекор қилинди. Масалан, Лариса Долина, Полина Гагарина, Григорий Лепснинг концертлари қўйилмади. Урушни қўллаб-қувватловчи актёр Сергей Глушко иштирокидаги спектакль ҳам бекор қилинган.
Аввалроқ Остона ва Олмаотадаги концертлари бекор қилинганидан шикоят қилган россиялик артист Максим Галкиннинг Қозоғистондаги концертлари маъқулланди. Бу ҳақда унинг продюсери Алексей Пучков маълум қилди.