Ўзбекистон мобил интернет нархи бўйича дунёда 22-ўринни эгаллади. Бу ҳақда Cable портали маълумот бермоқда.
Ўзбекистонда мобил интернетдан фойдаланувчилар 1 гигабайт учун ўртача 0,30 доллар тўлайди. Бу кўрсаткич бўйича мамлакат Марказий Осиёда 2-ўринни эгаллаган (дунё бўйича 22-ўрин).
Марказий Осиё ва МДҲдаги энг арзон нарх Қирғизистонда — 1 Гб учун 0,17 доллар. Мамлакат ўтган йилги даражасидан икки поғонага тушиб, 8-ўринни эгаллади.
Қозоғистон эса 0,41 доллар кўрсаткич билан 35-ўринни банд этган. Тожикистонда 1 Гб интернет нархи ўртача 1,65 доллар бўлиб, у жаҳонда 142-ўринда туради. Марказий Осиёда энг қиммат интернет эса Туркманистонда — 1 Гб учун 11,42 доллар. Мамлакат дунё бўйича 231-ўринни эгаллаган.
Дунё бўйлаб энг арзон мобил интернет Исроилда - 0,02 доллар.
Ўзбекистон 2022 йилда дунёдаги симли интернет тезлиги бўйича рейтингда 155-ўринда бўлган. 2023 йилда натижалар ўзгариб, 131-ўринга кўтарилган. Бунда, бир йил аввалги рейтингга нисбатан 24 поғонага ўсиш бўлган. Ўзбекистондаги симли интернет тезлиги 21,67 Мбит/с экани қайд этилган.