Вазир Саидов 2023 йилнинг май ойида Тошкентда Қатар элчихонаси очилганини эслатган.
“Шубҳасиз, ушбу элчихоналар алоқаларимизни янада мустаҳкамлашга хизмат қилади”, дейилган хабарномада.
Аввалроқ Озодлик Қатар амири Тамим бин Ҳамад Ол Соний июнь ойи бошида Самарқандга ташриф буюриб, Ўзбекистон президенти Шавкат Мирзиёев билан музокаралар ўтказгани, музокаралар якунида икки давлат раҳбарлари иштирокида 15 та икки томонлама ҳужжатни имзолаш маросими бўлиб ўтгани ҳақида хабар қилган.
“Биз Қатарни нафақат Яқин Шарқ минтақасида, балки бутун араб-мусулмон оламида ўзимизнинг истиқболли ҳамкоримиз сифатида биламиз”, деганди Мирзиёев ўшанда.
Ташриф чоғида Ўзбекистон билан Қатарнинг ширкатлари ўртасида энергетика, газ-кимё саноати, қишлоқ хўжалиги, инфратузилма, логистика, туризм ва бошқа тармоқларда умумий қиймати 12 миллиард доллардан зиёд йирик инвестиция лойиҳаларини амалга оширишда иштирок этиши юзасидан келишувга эришилгани хабар қилинган.
Жорий йилнинг 11 декабрь куни Қатар пойтахти Доҳада Ўзбекистон элчихонасининг очилиш маросими бўлиб ўтган. Бу ҳақда ташқи ишлар вазири Бахтиёр Саидов ўз Телеграм-канали орқали маълум қилди.