Жўқорғу Кенеш депутати Мейкинбек Абдалиев ички кийим ва пайпоқларга давлат рамзларини туширишни тақиқловчи қонун лойиҳаси ташаббуси билан чиқди.
Абдалиев охирги пайтларда кузатилаётган кийим-кечакнинг турли қисмларига, жумладан, ички кийим ва пайпоқларга давлат рамзларини тушириш давлат рамзларига ҳурматсизлик эканлигини таъкидламоқда.
Шунингдек, депутатнинг айтишича, давлат органига алоқаси бўлмаган жисмоний ва юридик шахслар ўз ташриф карточкаларига давлат рамзларини тушираётгани одамларни чалғишига ва алданишига сабаб бўлмоқда.
Қонун лойиҳасига изоҳда давлат рамзлари туширилиши тақиқланган маҳсулотлар (товарлар)нинг тўлиқ рўйхатини Вазирлар Маҳкамаси шакллантириши кўзда тутилган. Депутат тегишли ўзгартиришларни “Қирғизистон Республикасининг давлат рамзлари тўғрисида”ги қонунга киритмоқчи.
Аввалроқ айнан шу қонунга киритилган ўзгартиришлар орқали Қирғизистон байроғининг дизайни ўзгартирилган эди..