Институт раҳбари Антон Дробовичнинг айтишича, Параджановни реабилитация қилиш бўйича қарор 2023 йилнинг 20 декабрида қабул қилинган. Миллий комиссия жиноят ишини ўрганиб чиққанидан сўнг Параджановнинг қамалишига сиёсий мотивлар сабаб бўлган, деган хулосага келган.
“Реабилитация бўйича миллий комиссия ходимларининг фаолияти ортидан тарихий ҳақиқат тикланмоқда. Келажакда украиналик диссидентларнинг СССРда сиёсий мотивлар ва сохталаштирилган айбловлар асосида қамалганига оид бошқа оғир ва резонансли ишлар ҳам кўриб чиқилишига умид туғилмоқда”, - деб иқтибос келтиради Дробович сўзларидан “Настояшчее время” телеканали.
Сергей Параджанов арман миллатига мансуб совет режиссёри. У Грузияда туғилган, Арманистон ва Украинада ишлаган. 1990 йилда Ереванда вафот этган.
Параджанов совет кинематографиясининг «янги тўлқини» ва «поэтик кинематография»нинг асосчиларидан бири ҳисобланади. «Унитилган аждодлар соялари» ва «Анорнинг ранги» фильмлари ортидан у жаҳонга танилган.
1974 йилда Параджанов зўравонлик йўли билан бесоқолбозлик қилганликда ва порнография тарқатганликда айбланиб беш йилга қамалган эди. У ўзининг бисексуал эканини яширмаган, аммо зўравонлиқ қилганини тан олган эмас. Параджанов антисовет ташвиқотида айбланаётган украин ёзувчиларини қўллаб-қувватлашга ҳаракат қилганидан сўнг унга нисбатан жиноят иши очилган. Ҳуқуқ фаоллари режиссёрга нисбатан жиноят иши сохталаштирилганини билдиришган.
Украинанинг Реабилитация бўйича миллий комиссияси бундан 50 йил олдин бесоқолбозликда айбланиб қамалган совет кинорежиссёри Сергей Параджановни оқлади. Бу ҳақда Параджановнинг юз йиллиги нишонланган 9 январда Украина миллий хотира институти маълум қилди.