Ссылки доступа

Самарқандда пора учун икки нафар солиқчи қамалди


Самарқандда икки нафар солиқ ходими пора олгани учун қамалди. Бу ҳақда Олий суд матбуот котиби хабар бермоқда.

Қайд этилишича, Самарқанд тумани Давлат солиқ инспекцияси ходими Булунғур туманидаги тадбиркорга корхонасининг солиқ базасида жисмоний шахслардан олинадиган даромад ва ижтимоий солиқлардан асоссиз ҳисобланган қарздорликни камайтиришда ёрдам беришини айтган.

Солиқчи бунинг учун 1000 доллар талаб қилган. Шундан сўнг у тадбиркорнинг 300 миллион сўмга яқин солиқ ва пеня қарздорлигини камайтиришда Булунғур тумани солиқ инспекцияси камерал солиқ текширувлари шуъбаси бошлиғи лавозимида ишловчи танишини шерик қилган.

Солиқчи Самарқанд шаҳридаги кафелардан бирида тадбиркордан “хизмат ҳақи” сифатида 500 доллар олаётганда ашёвий далиллар билан ушланади.

Жиноят ишлари бўйича Самарқанд шаҳар судида ўтказилган суд мажлисида солиқ ходимларига ҳукм ўқилган. Уларнинг иккаласи ҳам Жиноят кодексининг 210-моддаси (пора олиш) 2-қисми “в” банди билан айбдор деб топилиб, 5 йилга озодликдан маҳрум қилинган.

XS
SM
MD
LG