Бишкек иссиқлик электр станциясида 2 февраль куни содир бўлган аварияда беш киши жароҳатланган, улардан уч нафари шифохонага ётқизилган. Бу ҳақда Қирғизистон соғлиқни сақлаш вазири ўринбосари Медербек Исмоилов маълум қилди.
Икки кишининг аҳволи ўта оғир, учинчи жабрланувчининг аҳволи ўртача оғирликда деб баҳоланмоқда. Яна икки жабрланувчи амбулатор даволанишда.
Авария 2 февраль куни азонда Бишкек иссиқлик электр станцияси иситиш блокининг 14-қозонида содир бўлган. Шаҳар иситиш режимини сақлаб қолиш учун иссиқ сув таъминотига чекловлар киритилди, мактаблар ва болалар боғчалари онлайн таълимга ўтказилган.
Ҳодиса сабаблари ўрганилмоқда. Расмийлар воқеанинг икки версиясини кўриб чиқмоқда.
Миллий хавфсизлик давлат қўмитаси раҳбари Қамчибек Ташиевнинг топшириғига кўра, диверсия эҳтимоли кўриб чиқилмоқда. Чунки авариядан аввалроқ бир неча маротаба портлаш овозлари эшитилган. Иккинчи версияда эса техник муаммолар сабаб сифатида кўрилмоқда.
Қирғизистон президенти Садир Жапаров 2 февраль куни Бишкек иссиқлик электр станциясида амалга оширилаётган реставрация ишларини бориб кўздан кечирган.
МХДҚ диверсия эҳтимолини истисно қилмаяпти