Фархор туман милициясининг ходимлари хорижда яшовчи мухолифат фаоли Шарофиддин Гадоевнинг онасининг хорижга чиқиш паспортини олиб қўйган. 72 ёшли Оишамо Абдуллоева даволаниш учун хорижга учиб кетиши керак эди.
Абдуллоева хорижга чиқиш учун паспорт олган, бироқ уч кундан кейин милиция ходимлари уйига келиб «хато кетганлиги» баҳонасида ушбу паспортни олиб қўйишган. Бу ҳақда у 14 февраль куни Озоди радиосига берган интервьюсида айтган. Мутасаддилар ҳозирча бу хабарни инкор қилгани йўқ.
Оишамо Абдуллоеванинг сўзларига кўра, ходимлар унга икки кун ичида янги паспорт беришни ваъда қилган. Бироқ уч ҳафтадан кейин ўзи паспортни сўраб борганида унга паспорт бермаслик ҳақида норасмий кўрсатма мавжудлигини айтишган.
Шарофиддин Гадоев бу ҳаракатларни ўзига босим ўтказиш усули деб билади. Унинг сўзларига кўра, аввалроқ онасининг уйида электр токи узиб кетилган, онасининг ўзи ҳам бир неча бор ҳуқуқ-тартибот идораларида сўроқ қилинган.
Шарофиддин Гадоев 2012 йилгача Тожикистонда тадбиркорлик билан шуғулланганини, бироқ унинг бизнесини Тожикистон президенти Имомали Раҳмоннинг қариндошлари тортиб олганини ва у мамлакатни тарк этишга мажбур бўлганини айтади. Ҳозирда Нидерландларда истиқомат қилаётган Гадоев "Гуруҳ-24" мухолифат ҳаракатининг асосчиларидан бири эди. Ҳозирда у Тожикистон Ислоҳот ва тараққиёт ҳаракатига асос солган ҳамда Тожикистонда фаолияти тақиқланган хориждаги мухолиф гуруҳлар коалицияси – "Миллий Иттифоқ" раҳбарининг ўринбосаридир.
Унга паспорт бермаслик ҳақида норасмий кўрсатма мавжудлигини айтишган.