“Қозоғистон темир йўли” собиқ президентнинг кенжа қизи Алия Назарбоевага тегишли ширкат билан чипталарни сотиш бўйича шартномани бекор қилди, деб ёзмоқда «Власть» нашри.
ҚТЙ раҳбариятининг маълум қилишича, 2023 йил 1 декабрдан бошлаб Instant Payments ширкати ўрнига “Мобил Портал” компанияси темир йўл чипталарини сотиш билан шуғулланмоқда.
ҚТЙ раиси ўринбосарининг айтишича, компания тендер асосида танланган ва у сотилган ҳар бир чипта учун 29 тенгедан олади.
Instant Payments 2011 йилда ташкил этилган. Расман таъсисчиси ва раҳбари Диас Мадигожин бўлмиш ширкатнинг ҳақиқий эгаси собиқ президент Нурсултон Назарбоевнинг кенжа қизи Алия Назарбоева ҳисобланади. Маҳаллий ОАВ ёзишича, ҳужжатларда аввал Алия Назарбоева компания асосчиларидан бири сифатида расман келтирилган. ҚТЙ ва Назарбоеванинг ширкати ўртасидаги келишув 2014 йилда ўн йилга имзоланган.
2022 йилнинг қонли "январь воқеалари"дан сўнг собиқ президент ва унинг қудратли оиласининг давлатчиликка таъсири заифлашган. Назарбоевнинг яқинлари тобора кўпроқ четга сурилмоқда ва турли лавозим ва бизнесларидан айрилмоқда, айримлари қамалмоқда ҳам.