Ссылки доступа

Қирғизистонда ягона олтин кони 302 млн доллар фойда кўрди


"Қумтор" Қирғизистоннинг икки президенти, тўртта бош вазирининг бошини еган.

Qumtor Gold Company 2023 йилда 849 млн доллар даромад топган. Режа 734 млн доллар эди, дея хабар бермоқда 26 февраль куни компания матбуот хизмати.

2023 йилда компания 13 тонна 577 кг олтин сотган. Соф фойда 302,4 млн долларни ташкил этган, режа 194 млн доллар эди. Солиқ ва бошқа тўловлар кўринишида республика бюджетига 17 миллиард 241 миллион 71 минг сом тўланган.

Қирғизистонда ягона олтин кон бўлмиш "Қумтор" кони икки президент, тўртта бош вазирнинг бошини еган. "Қумтор" билан боғлиқ айбловлар Қирғизистоннинг собиқ президентлари Асқар Акаев, Қурманбек Бакиев ва Алмазбек Атамбаевга қарши қўйилган, 20 га яқин юқори мансабдор жавобгарликка тортилган.

“Олтин кон масаласида биз икки президентни, тўртта бош вазирни, икки (Жўқорғу Кенеш) спикерини ва ўндан ортиқ бошқа юқори лавозимдаги амалдорларни жавобгарликка тортдик. Шунга асосланиб, биз Қумторни давлатга қайтаришга муваффақ бўлдик”, деган эди 2021 йилда МХДҚ раиси Қамчибек Ташиев.

2021 йилнинг март ойида “Қумтор Оперейтинг компани” ёпиқ ҳиссадорлик жамияти акцияларининг юз фоизи Қирғизистон ҳукумати ихтиёрига ўтказилган эди.

“Қумтор” олтин конини ўзлаштириш бўйича Қирғизистон ҳукумати 1992 йилда Канаданинг “Камеко” ширкати билан шартнома имзолаган эди. 1996 йилдан конда олтин қазиб олиш бошланган. Қирғизистон конни “Қумтор Оперейтинг компани” орқали Канаданинг “Центерра Голд” ширкати билан ҳамкорликда бошқариб келган.

2021 йил майида ҳукумат конни тўлиқ Қирғизистон ихтиёрига ўтказиш тўғрисида қарор чиқарган ва 2022 йилда ширкат акцияларининг юз фоизи “Қирғизолтин” ширкатига берилган эди. Дастлаб Қирғизистонни бу қарор учун судга берган “Центерра Голд” кейинроқ ўзининг барча даъволаридан воз кечган.

XS
SM
MD
LG