Қарағанда вилоятидаги Костенко номидаги кўмир конида октябрда ҳалок бўлган 46 кончининг яқинлари Қозоғистон президентига очиқ мурожаат билан чиқди.
Улар президентдан кончилар хотирасига ёдгорликни Қарағанда марказида ўрнатишда кўмак кутмоқда. Маҳаллий ҳокимият ёдгорликни кон ҳудудида ўрнатишни таклиф қилган, бироқ бунга улар рози эмас.
"Биз маҳаллий ҳокимиятга хат жўнатдик, аммо улар Қарағандада аллақачон етарлича ёдгорликлар борлигини айтишди. Шундай фожиали ўлимга учраган эркакларимиз шаҳар марказида ёдгорликка лойиқ эмасми?” деб сўрамоқда марҳум кончиларнинг оила аъзолари президентга видеомурожаатда.
Уларнинг Озодликка айтишича, бу ёдгорлик нафақат Костенко конида ҳалок бўлган кончилар, балки сал аввал "Ленин" ва "Қозоғистон" конларида ҳалок бўлган кончилар учун ҳам ягона хотира масканига айланиши мумкин.
Костенко номли конга эгалик қилаётган «Кармет» ширкати ҳам кончилар хотирасига ёдгорлик ўрнатиш масаласини кўриб чиқилаётганини маълум қилган.
Қарағанда вилоятида Костенко номидаги кўмир конида 28 октябрга ўтар кечаси содир бўлган портлаш ортидан 46 киши ҳалок бўлган. Кўмир конидаги ҳалокат ортидан Қозоғистонда 29 октябрь умуммиллий мотам куни деб эълон қилинди.
Мазкур кон “АрселорМиттал Темиртау” ширкатига қарашли бўлган. Расмий маълумотларга кўра, саккизта кон ва Қарағанда вилоятидаги металлургия комбинатига эгалик қилувчи “АрселорМиттал Темиртау” ширкати объектларида сўнгги 15 йил ичида 100 дан зиёд одам ўлган.
Қозоғистон президенти Қасим-Жомарт Тоқаев кондаги фожиадан сўнг “АрселорМиттал Темиртау” билан инвестициявий ҳамкорлик шартномаси тўхтатилишини билдирган. Шундан кўп ўтмай, "АрселорМиттал Темиртау" эгаси ўзгарди, ширкат ҳам "Қармет"
этиб қайта номланди.
Ҳалок бўлган кончиларнинг яқинлари Тоқаевдан Қарағанданинг марказий қисмида ёдгорлик ўрнатиб беришни сўрамоқда
Маҳаллий ҳокимият ёдгорликни кон ҳудудида ўрнатишни таклиф қилган.