West oil Software ширкати икки ойдан бери иш ташлашни давом эттираётган ходимларнинг 50 нафари билан меҳнат шартномасини узганини маълум қилди.
"Янги бўш иш ўринларига бошқа ходимларни ишга оламиз. Ноқонуний намойишнинг қолган иштирокчиларини иш жойига қайтишни сўраймиз", дейилади ширкат баёнотида.
Ширкатнинг баёнотида айтилишича, норози ҳодимлар билан меҳнат шартномаси тўлиқ Меҳнат Кодекски талабларига амал қилинган ҳолда бекор қилинган.
Аввалроқ ширкат раҳбарияти ҳодимлардан намойишни тўхтатиб ишга чиқишни ва "муаммоларни конструктив диалог орқали ҳал қилишни" буюрганди. Акси ҳолда, уларнинг барчаси ишдан ҳайдалиши айтилган. Иш ташлаган ҳодимларнинг "Власть" нашрига маълум қилишича, улар намойишларни давом этаверади ва "ишдан ҳайдашларига ўрганиб қолишган".
КМГ раҳбарларидан бири Жасулан Балуановнинг айтишича, иш ташлашдан кўрилган зарар бир миллиард 320 миллион тенгени (708 минг доллар) ташкил қилган.
Манғистау вилоятининг Жетибай қишлоғидаги West Oil ширкатининг 500га яқин ишчиси ўтган йилнинг 11 декабрида иш ташлаган эди.
Улар ширкатнинг “КазМунайГаз” таркибига киритилишини, ойликларни оширишни ва иш қуроллари, техниканинг янгиланишини талаб қилмоқда.
Энергетика вазирлиги ва "КазМунайГаз" иш ташлаган нефтчиларнинг талабларини асоссиз ва бажарилмайдиган шартлар деб баҳолади. Суд нефтчилар ўтказаётган иш ташлашни ноқонуний деб топган.
Қозоғистонда сўнгги йилларда иш ташлашлар сони кўпайди. Норозилар асосан иш ҳақини оширишни ва меҳнат шароитини яхшилашни талаб қилмоқда. Бу талаблар айрим ҳолатларда бажарилмоқда, айрим ҳолатларда эса норозилар ишдан бўшашга мажбур қилинмоқда.