Ғарбий Қозоғистон вилоятининг Уралск шаҳрида Бекболат Ўтебаев яккахон пикетга чиқди. У мамлакатдаги ижтимоий шароитни яхшилаш ҳамда шаҳарнинг марказий кўчасидан Назарбоев номини олиб ташлашни талаб қилмоқда.
59 ёшли пенсионер марказий Абай майдонига “Мен яшашни хоҳлайман" шиорини кўтариб чиққан. У бу шиорни “арзимас нафақага яшаб бўлмаслиги" билан изоҳлади.
“Ҳукумат белгилаган яшаш минимуми, аниқроғи таҳминан 155 АҚШ доллардан мен рози эмасман. Бу пулга яшашнинг иложи йўқ. Биз тирикчиликни эмас, тўлақонли яшашни истаймиз. Нафақа, пенсия ва маошларни кўтаринглар", дейди Ўтебаев.
Унинг яна бир талаби, шаҳардаги хиёбон ва марказий кўчадан Назарбоевнинг исмини олиб ташлаш бўлди.
"Назарбоев Қозоғистон халқини шилди, ўғирлик ва коррупция билан шуғулланган, фақат ўз оиласини бойитган. Кўчага эски "Мустақиллик” номини қайтаринг. Бизга мустақиллик Назарбоевдан қадрлироқ”, дейди Ўтебаев.
Пенсионер аввалроқ маҳаллий ҳокимиятга яккахон пикет ўтказиш тўғрисида билдиришнома топширган, бироқ рад жавобини олган.
Бу гал ҳам унинг олдига дарҳол икки киши югуриб келиб, "ноқонуний тадбирни" тўхтатишни талаб қилган. Ўтебоев майдонни тарк этишдан ва намойишни тўхтатишдан бош тортган.