Тожикистоннинг Панжикентда икки қизнинг ўз жонига қасд қилиши қайта тергов қилинмоқда. Терговни прокуратура олиб бормоқда.
Икки дугона 2023 йил сентябрь ойида ўзини кўприкдан ташлаган эди. Бу видеокузатув камераларига тушиб қолган. Ўз жонига қасд қилиш сабаблари ҳозирча номаълум.
Ички ишлар вазирлиги, воқеадан кўп ўтмай, қизларнинг жасадида зўравонлик аломатлари йўқлигини, бироқ қизлар кўприкдан дарёга сакрашдан олдин бир-бирларининг қўлларини арқон билан боғлаб қўйганини маълум қилган.
17 ёшли бу икки дугона Панжикент педагогика коллежи ўқувчиси бўлган. Улар 9 йил бир синфда ўқиган ва педагогика коллежига бирга ўқишга кирган. Улар шунингдек бир-бирига узоқ қариндош ҳам эди. Уларнинг оталари Россияда ишлаётган бўлган.
Тожикистонда ҳар йили юзлаб одамлар, асосан, хотин-қизлар ўз жонига қасд қилади. Мутасаддилар бундай воқеаларни иложи борича ошкор қилмасликка ҳаракат қилади ва улар деярли муносиб тергов қилинмайди.