Президент Садир Жапаров мамлакатни электр энергияси билан таъминлаётган Тўқтоғул сув омборидаги "сувни сотиш имконсизлигини" билдирди.
«Кабар» ахборот агентлигининг журналисти Тўқтоғул сув омборида сув сатҳининг пасайиб кетганлигини одамлар “сув сотилаётгани" билан боғлаётганини айтган. Садир Жапаров бунинг иложиси йўқлигини билдирган.
“Фикримча, бу популистлар томонидан энергетика ходимларига нисбатан янграётган оддий туҳматдир. У ерда онлайн камералар ўрнатилган. Ҳаммаси бевосита назорат қилинмоқда", деган президент.
Жапаровнинг қўшимча қилишича, агар кимдир сув омборидаги сувни ҳақиқатдан сотаётган бўлса, улар “қаттиқ жазоланади”.
Аввалроқ Қирғизистонда икки ГЭС таъмирталаб бўлгани учун электр энергияга чекловлар жорий этилган эди.
ҚМЭТ маълумотларига кўра, Тўқтўғул ва Уч-Қўрғон гидроэлектр станцияларидаги реконструкция ишлари деб чекловлар 5 мартдан киритилмоқда ва айниқса юклама энг оғир бўлган соатларда татбиқ этилади.
Энергетика вазири Таалайбек Ибраевнинг депутатларга хабар беришича, Тўқтўғул ва Учқўрғон ГЭСларида таъмир ишлари 20 февралда бошланиши керак бўлган, бироқ об-ҳаво кутилгандан совуқроқ бўлгани боис реконструкция 5 мартга кўчирилган.
Чекловлар 10 мартгача жорий этилмоқда. 10 мартдан об-ҳаво исиб кетиши кутилмоқда, бунинг натижасида аҳоли ўртасида электр энергияси истеъмоли ҳам камаяди.
Аввалроқ Энергетика вазири ўринбосари Таалайбек Байғозиев Тўқтоғул сув омборида сув ҳажми кескин камайгани сабабли фуқароларни электр энергиясини тежашга чақирган эди. Мулозимнинг қайд этишича, ҳозирда омбордаги сув ҳажми сўнгги йиллардаги энг паст кўрсаткичдадир.
Қирғизистонликлар Тўқтоғул сув омборида сув сатҳининг пасайиб кетганлигини “сув сотилаётгани" билан боғлаётган эди.