Мәліметтерге қарағанда, көне ғимараттар сүрілгені туралы хабарлаған блогерлер мен журналистерге қысым көрсетіліп жатыр.
«Қазір Бұхарада болып жатқан жағдайды нағыз қылмысқа жатқызуға болады. Көне үйлерді сүру Өзбекстан тарихындағы ең қайғылы күндердің бірі ретінде тарихта қалады» деп мәлімдеді өзбек блогерлерінің бірі Азаттықтың Өзбек қызметіне. Ол жеке басының қауіпсіздігі мақсатында аты-жөні материалда аталғанын қаламады.
Журналист Мухрим Ағзамхожаев «Бұхара орталығындағы ондаған ғимаратты сүріп, оның орнына жасанды тарихи қала салушылар – Бұхараның ғана емес, Өзбекстанның да жаулары» деп жазды.
Кем дегенде төрт блогер қысымға ұшырағанын айтып, журналистерден олардың даусын эфирге бермеуді сұраған.
«Мені қорқытып жатыр. Өтініп сұраймын – дауысымды эфирге жібермеңіздер. Себебін өздеріңіз де түсінесіздер» дейді тағы бір өзбек блогері.
Биыл 26 ақпанда Бұхарада тарихи қаланың бір ауданы сүріле бастады. Билік оның орнына этнографиялық туристік орталық салуды көздеп отыр. Мәліметтерге қарағанда, бұл жобаға 470 млн доллар бөлінген.