Қозоғистонда декабрдан бери намойиш қилаётган нефтчиларнинг бир шарти бажариладиган бўлди

“КазМунайГаз” миллий компанияси West oil Software ширкатига оид техника паркини янгилашга рози бўлди. Бу ҳақида КМГ бошқарув кенгашининг раиси Нурсеит Суюнов маълум қилган. Иш қуроллари, техниканинг янгиланишини Манғистау вилоятининг Жетибай қишлоғидаги West Oil ширкатининг иш ташлаган ходимлари талаб қилган эди.

Намойишчилар, шунингдек, ширкатнинг “КазМунайГаз” таркибига киритилишини ва ойликларни оширишни талаб қилган эди.

Суюновнинг маълум қилишича, йил охиригача транспорт паркини янгилаш режалари доирасида 70та техника сотиб олинади. Намойишчиларнинг қолган икки шартини бажариш имконсиз эканлигини Суюнов алоҳида таъкидлаган. Унинг айтишича, иш жойига қайтган 143 ходим март ойи учун маошларини олган. У қолган намойишчиларни ҳам иш ташлашни тўхтатишга чақирган.

Манғистау вилоятининг Жетибай қишлоғидаги West Oil ширкатининг 500га яқин ишчиси ўтган йилнинг 11 декабрида иш ташлаган эди. Суд нефтчилар ўтказаётган иш ташлашни ноқонуний деб топган.

West oil Software ширкати иш ташлашни давом эттираётган ходимларнинг 50 нафари билан меҳнат шартномасини февралда узганини маълум қилган.

КМГ раҳбарларидан бири Жасулан Балуановнинг айтишича, иш ташлашдан кўрилган зарар бир миллиард 320 миллион тенгени (708 минг доллар) ташкил қилган.

Намойишчилар ширкатнинг “КазМунайГаз” таркибига киритилишини, ойликларни оширишни ва иш қуроллари, техниканинг янгиланишини талаб қилмоқда.

Энергетика вазирлиги ва "КазМунайГаз" иш ташлаган нефтчиларнинг талабларини асоссиз ва бажарилмайдиган шартлар деб баҳолади.

Қозоғистонда сўнгги йилларда иш ташлашлар сони кўпайди. Норозилар асосан иш ҳақини оширишни ва меҳнат шароитини яхшилашни талаб қилмоқда. Бу талаблар айрим ҳолатларда бажарилмоқда, айрим ҳолатларда эса норозилар ишдан бўшашга мажбур қилинмоқда.