Остона қозоқ нефти экспортининг асосий йўналишларидан бири бўлган Каспий қувурлари консорциуми (КҚК) хавфсизлиги бўйича Россия ва Украина билан маслаҳатлашувлар ўтказмоқда. Бу ҳақида 26 март куни Энергетика вазири Алмасадам Саткалиев маълум қилди.
“Халқаро истеъмолчилар, жумладан, европалик истеъмолчилар, биринчи навбатда, ушбу қувурнинг барқарор ишлашидан манфаатдор. Биз Европа давлатларининг элчихоналари ва Россиядаги ҳамкасбларимиз билан қувурнинг барқарор ишлашини таъминлаш масаласида доимий алоқадамиз. Шунингдек, Украина томони билан дипломатик каналлар орқали тегишли маслаҳатлашувлар давом этмоқда”, деди Саткалиев ҳукумат соатида.
Шунингдек, у КҚК ишидаги аввал кузатилган беқарорликлар “об-ҳаво омили” ва режадаги капитал таъмирлаш ишлари билан боғлиқ эканлигини айтган.
22 март куни Financial Times ўз манбаларига таяниб ёзишича, Вашингтон Украинадан Россия энергетика инфратузилмасига ҳужумларни, хусусан, КҚК ишига бериши мумкин бўлган зарар деб тўхтатишни сўраган.
Украина президенти девони раҳбари маслаҳатчиси Михаил Подоляк Вашингтондан бундай талаб бўлганини инкор этди.Украина бош вазирининг Европа ва Евроатлантика интеграцияси бўйича ўринбосари Олга Стефанишина кейинроқ Россия нефтни қайта ишлаш заводлари Украина зарбалари учун жоиз нишон эканлигини таъкидлаган.
Европага сотилаётган қозоқ нефтининг 80 фоизи Россия ҳудудидан ўтадиган Каспий қувурлари орқали етказиб берилади.
Россия Украинага уруш очганидан сўнг ўтган бир неча ой ичида Москва турли сабабларни баҳона қилиб, Қозоғистоннинг Каспий қувурлари консорциуми орқали ғарбга нефть экспорт қилишига тўсқинлик қилган. Шундан сўнг Остона нефть етказиб беришни диверсификация қилишга, жумладан Россияни четлаб ўтадиган Транскаспий қувурини такомиллаштиришга жиддий киришган.