Мигранттардың айтуынша, бірнеше адамды айыппұл төлегеннен кейін босатқан, бірақ көбісін депортациялау жөнінде шешім қабылданған. Айыппұлмен босап шыққан мигранттар қатты қорқып қалған.
«Қайда барарымды, не істерімді білмеймін. Дүкенге де қорқып кіремін. Не болып жатқанын түсінбеймін. Екі-үш адамға бола тәжіктердің бәрі зардап шегіп жатыр. Құжаттарың дұрыс болғанына қарамайды, елден шығарып жібере салады. Жақында ағамды ұстап, Ресейге кіруге өмір бойы тыйым салды. Оның себебін ешкім түсіндірмейді» дейді мигранттардың бірі. Азаматтардың жеке басының қауіпсіздігі үшін Ресейдегі мигранттардың аты-жөні осы мақалада аталмайды.
Арнайы жасақтың тәжік мигранттарының жатақханасындағы «операциясы» кезінде түсірілген бірнеше видео Азаттықтың Тәжік қызметінің редакциясына түсті. Видеолардың бірінде екі қолын мойнына асқан мигранттар қаз-қатар жүріп келеді, ал тағы бір видеода мигранттар екі қолын арқасына тастап, өздері жерде жатыр.
«Крокус Сити Холл» концерт залындағы шабуылдан кейін Ресейдегі қалаларда мигранттарды ұстау жиілеп кетті. Еңбек миранттары қысым мен ксенофобия күшейгеніне шағымданды.