Берлинда қозоғистонлик фем-фаоллар рафиқасини ўлдиришда гумонланаётган собиқ иқтисодиёт вазири Бишимбаевнинг маҳкамаси фонида фемицид ва оилавий зўравонликка қарши намойиш уюштирди.
“Қозоғистонда ва умуман минтақада анчадан бери оилавий зўравонлик масаласи долзарблигича қолмоқда. Салтанат Нукенованинг иши, афсуски, биринчи ва охиргиси ҳам эмас. Бироқ, оҳирги пайтларда тобора кўпроқ зўравонлик қурбонлари гапириш учун жасорат топмоқда. Мамлакатимизда "уят" тушунчаси ҳукмрон ва оилада зўравонликка учраганлигини ошкор қилишга қодир аёллар кўп эмас”, дейди тадбир ташкилотчиларидан бири Симбат Серикова.
Намойишчилар Қозоғистонда оилавий зўравонлик ҳали криминаллаштирилмаганини таъкидлаб, собиқ вазир енгил жазо билан қутилиб қолмаслиги лозимлигини айтмоқда. Улар,шунингдек, оиладаги зўравонликка бағрикенг бўлмасликка, оиладаги зўравонликка қарши курашиш тўғрисидаги қонунни қабул қилишга чақирмоқда.
Тадбирда 120 дан ортиқ киши, жумладан, Озарбайжон, Ҳиндистон, Қирғизистон, Туркманистон, Ўзбекистон, Украина ва Жанубий Корея каби давлатлар вакиллари иштирок этган.
Рафиқасини ўлдиришда гумонланаётган собиқ иқтисодиёт вазири Бишимбаевнинг иши судда ҳакамлар ҳайъати иштирокида кўрилмоқда. Бишимбаев қийнаш ва ўта шафқатсизлик билан қасддан одам ўлдиришда айбланмоқда. Суд муҳокамасида у бу айбловларни рад этиб, қасддан одам ўлдирмаганлигини иддао қилган.
Бишимбаевга тегишли ҳисобланган Остонадаги Гастро-марказ ресторанида Бишимбаев ва хотини Салтанат Нукенова ўртасида жанжал келиб чиққан, натижада аёл тан жароҳатларидан вафот этган.
Айби исботланса, собиқ вазир 15 йилдан 20 йилгача, ёки умрбод, озодликдан маҳрум этилиши мумкин.
Собиқ иқтисодиёт вазири Куандик Бишимбаев 2018 йилнинг март ойида коррупцияда айбланиб, 10 йилга қамалган эди. У Қизилўрда шаҳрида шиша заводини қуриш учун ажратилган миллиард тенгени ўзлаштиришда ҳамда қурувчилардан пора олишда айбланган. 2019 йил октябрь ойида Бишимбаев шартли озодликка чиққан эди.
43 ёшли Куандик Бишимбаев Назарбаев даврида ҳукуматда юқори лавозимларда ишлаган. Фаолиятини Нурсултон Назарбоевнинг ёрдамчиси сифатида бошлаган.
БМТ маълумотларига кўра, Қозоғистонда ҳар йили 400га яқин аёл турмуш ўртоғи томонидан ўлдирилади.
Намойишчилар Қозоғистонда оилавий зўравонлик ҳали жиноят сифатида эътироф этилмаганини таъкидлаб, собиқ вазир Бишимбаев енгил жазо билан қутилиб қолмаслиги лозимлигини айтмоқда.