Шығыс Қазақстан облыстық әкімдігі Азаттық сауалына осылай деп жауап берді.
«Шаңырақ» - Риддердегі 16 орта мектептің ішінде қазақ тілінде білім беретін жалғыз білім мекемесі.
Облыс әкімдігінің жауабында 2023 жылғы 27 желтоқсанда «Қазмырыш» компаниясымен арадағы меморандум жасалғаны, соның аясында 600 орындық мектеп ғимараты салынатыны айтылған. «Ғимарат 2025 жылы қолданысқа беріледі. Оған «Шаңырақ» мектебі көшіріледі» деп жазылған әкімдік жауабында.
Мектеп ұжымы жаңа ғимаратты бірнеше жылдан бері күтіп жүр. Қазір мұндағы білім беру ісі №11 аралас мектептің ғимаратында өтіп жүр.
«Шаңырақ» мектебінің іргесі 1991 жылы қаланған, 2023 жылға дейін екі бөлек корпуста қатар орналасып келді. Бұл ғимараттар 1936 және 1958 жылдары салынған. Оқушылардың ата-аналары ескі ғимараттардың шатыры құлап кете ма деп алаңдаған. Сол себепті жергілікті әкімдік «Шаңырақты» № 11 мектепке көшіре салған.
Қазір Риддерде 16 мектеп бар. 12 мектеп орыс тілінде, үш мектеп аралас тілде білім береді. Қазақ мектебінде 600-ге жуық оқушы білім алады. Аралас мектептерге де осыншама бала барады.
Риддер — Шығыс Қазақстан облысындағы екінші ірі қала. Билік мәліметінше, мұнда 50 мың адам тұрады. Қала халқының 80 пайызы – орыстар.