Украинага катта миқдордаги ҳарбий ёрдам, жумладан ATACMS ракеталари ойининг охиригача Киевга етказилиши мумкин. Бу ҳақда The Washington Post ёзмоқда.
Мақолада айтилишича, тегишли қонун лойиҳасини Сенат ва Жо Байден имзолаганидан сўнг АҚШ қуролларини етказиб бериш учун Пентагонга бир ҳафтадан камроқ вақт керак бўлади.
Сенат қонун лойиҳасини шу ҳафта тасдиқлаши, Жо Байден эса уни пайшанба кунларга яқин имзолаши кутилмоқда.
Маҳаллий ОАВ ёзишича, Пентагон Украинага ҳарбий ёрдамнинг катта партиясини олдиндан тайёрлаб қўйган, шунинг учун уларни Киевга топшириш жараёни тез бўлиши кутилмоқда.
АҚШ Конгресси Вакиллар палатаси 20 апрель куни республикачиларнинг қаттиқ қаршилигига қарамай кўпчилик овоз билан Украина, Исроил ҳамда Тайван учун умумий 95 миллиард долларлик ёрдам пакетини ажратиш лойиҳасини қабул қилди ҳамда тасдиқлаш учун Сенатга юборди.
Зеленский бу ёрдам “урушни адолатли тарзда, Путиннинг мағлубияти билан тугатишда« муҳим эканини таъкидлади:
"Бугун АҚШ ёрдами бўйича узоқ кутилган қарорни олдик. Бунинг учун жуда қаттиқ курашдик. Айниқса фронтдаги аскарларимиз, Россия терроридан азият чекаётган шаҳар ва қишлоқларимиз бу ёрдамнинг аҳамиятини жуда чуқур ҳис қилади. Биз учун овоз берган Вакиллар палатасининг ҳар бир аъзосига раҳмат. Бу ҳаётни ҳимоя қилиш қароридир. Ҳудди биз каби рус ёвузлиги ғалаба қозонмаслиги кераклигига ишонадиган барча америкаликларга шахсан миннатдорчилигимни билдираман".
Киев урушнинг бошидан Вашингтондан 300 километргача масофага отилувчи ATACMS ракеталарини етказиб беришни сўраб келаётган эди. Бу ракеталар воситасида Украина Россия босиб олган барча ҳудудлар, жумладан, аннексия қилинган Қримдаги ҳарбий объектларга ҳам ҳужум қилиши мумкин.
Киев урушнинг бошидан Вашингтондан 300 километргача масофага отилувчи ATACMS ракеталарини етказиб беришни сўраб келаётган эди.