Римда тожикистонлик муҳолифатчиларнинг ташкилоти бўлмиш “Гуруҳ 24”нинг саккиз нафар фаоли 23 апрель куни ҳибсга олинди. Бу ҳақида ташкилотнинг ўзи хабар бермоқда.
Фаоллар расмий ташриф билан Италияда бўлиб турган Тожикистон президенти Эмомали Раҳмон сиёсатига қарши намойишда иштирок этмоқчи эди. Улар бу учун Италия пойтахтига Европанинг турли давлатларидан етиб келган.
"Гуруҳ 24" ҳаракатининг айтишича, фаоллар президент саройи ёнида Имомали Раҳмон кортежи чиқишини кутаётган пайтда ҳибсга олинган ва Раҳмоннинг Италияга ташрифининг якунигача ҳибсда қолиши мумкин. Маҳаллий ОАВ Тожикистон президенти 26 апрель куни Ватиканга келиши ҳақида хабар бермоқда.
Аввалроқ Литвада бир гуруҳ тожик мухолифатининг вакиллари Эмомали Раҳмоннинг Римга ташрифига қарши норозилик намойиши ўтказиб, Италия ва бошқа Европа давлатлари ҳукуматидан Тожикистон президентини қабул қилмасликка сўраган эди.
Шу билан бирга, 23 апрель куни Римда Тожикистон ички ишлар вазири Рамазон Раҳимзода италиялик ҳамкасби Маттео Пянтедози билан, Тожикистон ИИВ сайтида таъкидланганидек, “қидирувдаги шахсларни ҳибсга олиш ва Тожикистонга экстрадиция қилишни муҳокама қилган”.
“Жиноятчиларнинг бир қисми Европага, жумладан, Италияга қочиб, турли баҳоналар билан у ерда бошпана сўраган. Қайд этилишича, Тожикистон ва Италия ҳуқуқни муҳофаза қилувчи органларининг ҳамкорлиги ушбу шахсларни жиноий жавобгарликка тортишга ёрдам беради”, дейилади ИИВ хабарида.
«Гуруҳ 24» ҳаракати мухолифатчи тадбиркор Умарали Қувватов томонидан ташкил этилган. Тадбиркорнинг ўзи 2015 йилда Истанбулда ўлдирилган. Ҳаракат Тожикистонда суд томонидан 2014 йилда «экстремистик» деб эълон қилинган. Тожикистонда ўнлаб одамлар ушбу ташкилотга аъзоликда айбланиб, қамалган.