Қозоғистон Ташқи ишлар вазирлиги Бирлашган Араб Амирликларидаги элчихона маслаҳатчисини “зудлик билан” чақириб олганини маълум қилди. Бунга дипломатнинг турмуш ўртоғининг ёрдам сўраб қилган видеомурожаати сабаб бўлган.
NeMolchi.kz лойҳаси томонидан тарқатилган видеолавҳада, элчихона маслаҳатчиси Сакен Мамашнинг рафиқаси йиллар давомида турмуш ўртоғи томонидан зўравонликка учраб келаётганидан шикоят қилган.
“Кеча, Қозоғистоннинг БААдаги элчисининг маслаҳатчиси бўлмиш турмуш ўртоғим, мени ва мени кўргани келган катта опамни калтаклади. Мен давлатимиздан ёрдам сўрайман", дейди Карина Мамаш видеомурожаатида.
У эри дипломатик мақомдан маҳрум этилишини ва жиноий жавобгарликка тортилишини сўраган. Аёлнинг айтишича, у 10 йил мобайнида жисмоний ва жинсий таҳқирланган, руҳан эзилган.
Бу видеомурожаатга Қозоғистон Ташқи ишлар вазирлиги 6 май куни муносабат билдирди.
“Биз элчихона ходимини зудлик билан Қозоғистонга чақириб оляпмиз. Кейинчалик унинг иши ҳуқуқ-тартибот идоралари томонидан кўриб чиқилади. У ишдан бўшатилмоқда”, — деди Қозоғистон ТИВ матбуот котиби Айбек Смадияров.
Қозоғистон аёлини калтаклаган дипломатни чақириб олди
Қозоғистоннинг Бирлашган Араб Амирликларидаги элчихонасининг маслаҳатчиси ишдан бўшатилди.