Маълум бўлишича, корхонанинг айни кундаги директори,Сардор Кариевнинг онаси Мунира Кариева шундай илтимос билан Жиноят ишлари бўйича Тошкент шаҳар суди раиси ва апелляция инстанциясига мурожаат қилган.

«Мен зарарли дорилар таъсиридан болалари вафот этиб, жабрланган ота-оналарнинг оғриқли яраларига бироз бўлсада малҳам бўлиши учун ҳамда ўғлим Сардор Кариевнинг қисматини енгиллатишга эришиш учун ҳозирда ўзим раҳбарлик қилаётган Jurabek Laboratories МЧЖнинг иқтисодий салоҳиятини айнан суд ҳукмида жабрланган ота-оналарга ундириб берилиши белгиланган маънавий зарарларни тўлаб беришга йўналтирмоқчиман», — дейилади Мунира Кариеванинг судга берган аризасида.

Мунира Кариева катта миқдордаги маблағни Jurabek Laboratories МЧЖнинг ҳисоби ва мулкидан бирданига ажратиб бериб бериш имкони йўқлиги таъкидлаган.

«Ҳозирги кунда Jurabek Laboratories МЧЖда 2000 нафардан ортиқ одам ишлаши, ҳар бирининг оиласининг ризқи ҳам шу корхона фаолияти билан чамбарчас боғлиқлигини инобатга олган ҳолда, шунингдек, илгари четдан қиммат нархларда импорт қилинадиган кўпгина дори воситаларини маҳаллийлаштириб, ўзимизда ишлаб чиқарилиши билан боғлиқ жараёнда ҳам Jurabek Laboratories МЧЖ етакчилик қилаётгани боис суд ҳукмида кўрсатилган маънавий зарар учун тўланиши керак бўладиган маблағларни корхонанинг асосий фаолиятига таъсир қиладиган усулда бирданига ажратиб олишга менинг маънавий ҳуқуқим ҳам йўқ», — дейди у ҳ ва пул тўлиқ тўланиши учун 3 йиллик муддат сўради.

26 февраль куни суд «Док-1 Макс» сиропи иши бўйича Сардор Кариевни 18 йилга, унинг ўринбосарларини 16 йилга, Ҳиндистон фуқароси бўлган Quramax компаниясининг собиқ директорини 20 йилга озодликдан маҳрум қилди.

Тошкент шаҳар суди судланувчилардан «Док-1 Макс» ва «Амбронол» препаратларидан заҳарланган 68 нафар ҳалок бўлган ва 16 нафар жароҳатланган боланинг оилаларига 75,6 миллиард сўм маънавий зарар ундириш ҳақида қарор чиқарди. Бундан ташқари, суд Quramax мансабдор шахсларга берган пора миқдорини давлат фойдасига ундиришга қарор қилди.