Қирғизистон президенти Садир Жапаров 2010 йил инқилоби иштирокчиларининг яқинларига завод қуриш учун ер майдони ажратиб берганини тасдиқлади.
“Апрель воқеаларида 205 киши ҳалок бўлди, уларнинг яқинлари бирлашиб, акциядорлик жамияти очдилар. Ҳамдардлик, 200 та оилага ёрдам сифатида уларга бир гектардан ортиқ ер ажратдим... Ерни бир кишига эмас, шу акциядорлик жамиятига ажратдик”, - дейди Садир Жапаров 22 июнь куни «Кабар» ахборот агентлигига берган интервьюсида.
Президентнинг айтишича, собиқ президент Бакиев ушбу оилаларга 200 ўринли тикувчилик фабрикаси қуриб беришга ваъда берган экан, ер шу фабрикага ажратилди.
"Вақт берайлик, фабрика қурилмаса, ерни тезда давлатга қайтарамиз”, - дея хулоса қилди президент.
Аввалроқ Апрель халқ инқилоби ташкилотлари ассоциацияси бош котиби Темирлан Султонбеков Садир Жапаров ва Миллий хавфсизлик давлат қўмитаси раҳбари Қамчибек Ташиевга очиқ мурожаат билан чиққан эди. Унинг таъкидлашича, май ойида 1,58 гектар майдон "икки ой олдин" ташкил этилган акциядорлик жамиятига 49 йилга ижарага берилган.
"7 апрель инқилоби" АО таъсисчиси ва директори муқаддам судланган Шеримбаев Усупбий Бактибекович бўлади. У ҳамма ерда Минскда бўлганини, Қурманбек Бакиев билан учрашганини ва кийим-кечак фабрикасини очишини айтиб юрибди. Бироқ 2024 йил январь ойида мамлакат президенти Садир Жапаров апрель инқилоби ташкилоти вакилларини йиғиб, барчани тинглаб, ягона тўғри қарор қабул қилган эди – ер ажратиш мавзусини абадий ёпган эди”, - деб ёзган Темирлан Султонбеков.
2010 йил апрель ойида Қирғизистонда президент Қурманбек Бакиевнинг оилавий бошқарувига қарши оммавий норозилик намойишлари бўлиб ўтди. Ўша кунларда Бишкек, Талас ва Ўшда мухолифат етакчилари ҳибсга олина бошлади. 7 апрель куни уларнинг озод этилишини талаб қилиб чиққан намойишчилар Бишкекдаги Оқ уйни эгаллаб олишди. Намойишчиларга қарата ўт очилди, 87 киши ҳалок бўлди.
Бу воқеалар ҳукуматнинг ағдарилишига олиб келди. Қурманбек Бакиев ва унинг яқинлари қочиб кетган.
Апрель воқеалари бўйича суд жараёни бир неча йил давом этди. Натижада 28 нафар айбланувчига нисбатан ҳукм чиқарилди. Қурманбек Бакиев ва унинг тўнғич ўғли Марат ҳар бири сиртдан 30 йилга, Жаниш ва Максим Бакиевлар эса умрбод қамоқ жазосига ҳукм қилинди.
2010 йил апрель ойида Қирғизистонда президент Қурманбек Бакиевнинг оилавий бошқарувига қарши оммавий норозилик намойишлари бўлиб ўтди.