Маълум қилинишича, полиция 18 ёшли жиноятчи Леопольдо Нэша Монтойени Панамадаги қариндошининг уйида қўлга олган. У ўтган ҳафта иккинчи даражали қотилликда айбланиш учун Нью-Йоркка экстрадиция қилинган.
“Ўғлимнинг қотили билан юзма-юз келсам, ўзимга жавоб бера олмайман. Агар у озодликда бўлса, бошқа болаларни ҳам ўлдирган бўларди. Ўғлимни сабабсиз ўлдирди. Бу менга жуда оғир ботди”, дейди Фаридун Мавлоновнинг отаси.
Фаридун Мавлоновнинг жанозаси Sunset боғида бўлиб ўтган ва унда Нью-Йорк мэри Эрик Адамс қатнашганди.
Воқеа бир йил олдин 17 июль куни содир бўлган. Отишмадан икки соат олдин мактаб ўқувчиларининг икки гуруҳи ўзаро тортишиб қолган. Шундан сўнг улар дарслар якунлангач кўчада учрашиб, баҳсни муштлашув орқали ҳал қилишга келишиб олишган. Аммо Фаридун Мавлонов мансуб бўлган гуруҳ келишилган жойга етиб келганида иккинчи гуруҳдаги 17 ёшли ўсмир тўппонча билан ўқ уза бошлаган. Ўқлардан бири Фаридунни яралаган. У касалхонада хушига келмай вафот этган.
Фаридун Мавлоновнинг оиласи бундан 12 йил аввал Ўзбекистондан АҚШга кўчиб борган. Унинг отаси Фирдавс Мавлонов сартарош бўлиб ишлайди. Фаридун оиладаги олти фарзанддан бири бўлган. У New Utrecht ўрта мактабида ўқиган.