Кариб денгизининг Колумбия қирғоқлари яқинида АҚШга отланган муҳожирларни ташиётган қайиқ чўкиб кетди. "Америка овози" хабар беришича, қайиқда 20 нафар муҳожир, жумладан бир нечта Қозоғистон фуқароси ҳам бўлган.
Бир киши ҳалок бўлди, тўрт киши бедарак йўқолди, 15 киши қутқарилган. Қутқарилганларнинг 6 нафари вояга етмаганлардир. Улар орасида икки нафар қозоғистонлик бор.
Катталар орасида Колумбия, Эквадор, Эрон, Никарагуа, Қозоғистон ва Венесуэла фуқаролари бор, деб маълум қилди колумбиялик ҳарбийлар. Уларнинг айтишича, Колумбия денгиз флотининг тезкор бўлинмалари жалб этилган қидирув-қутқарув операцияси давом этмоқда.
Муҳожирлар Никарагуа орқали АҚШга кетмоқчи бўлган. Колумбиянинг таъкидлашича, муҳожирлар Колумбия ва Панама ўртасидаги хавфли чангалзорлардан ўтмаслик учун Сан-Андрес ороллари ва Никарагуа ўртасидаги денгиз йўналишдан тез-тез фойдаланади.
Май ойида Вашингтон Никарагуани АҚШга киришга интилаётган ноқонуний муҳожирлар оқимини ташкил этишда айблаб, унга қарши санкциялар киритди.
АҚШга Марказий Осиё мамлакатларидан ноқонуний равишда келаётган муҳожирлар сони ортиб бормоқда. Ўтган йили АҚШга Мексика орқали Ўзбекистондан 17 мингга яқин, Қирғизистондан етти минг, Тожикистондан уч минг, Қозоғистондан 2,7 минг ва Туркманистондан икки мингга яқин киши ноқонуний кириб келган.