Ўш ҳокимлигининг тўрт собиқ амалдори сел тошқинларини ўзанга солиш учун мўлжалланган ер участкасини сотиб юборганликда гумонланиб қўлга олинди. Бу ҳақда 24 июль куни Миллий хавфсизлик давлат қўмитаси матбуот хизмати хабар берди.
Ўшда сел келиши сабабларини ўрганиш натижасида ернинг ноқонуний сотилгани ва у ерда турар жойлар қурилгани аниқланди. Шаҳар кенгашининг депутатига ушбу ерларнинг сотилишига архитектура ва қурилиш ишларига масъул бўлган бир нечта идора ходимлари кўмаклашган. Ҳозирда улар қўлга олинган. Собиқ депутат қидирувга берилган.
Эслатиб ўтамиз, 14 июль куни Ўшда кузатилган шиддатли жала туфайли Оқбура дарёси қирғоғидан тошиб чиққан, бунинг оқибатида шаҳар марказий бозори ва дарё қирғоғидаги объектлар сув остида қолган эди. Сел тошқини натижасида беш киши қурбон бўлган, улардан тўрт нафари битта оила аъзолари бўлишган.
Кейинроқ Қирғизистон Миллий хавфсизлик давлат қўмитаси раҳбари Қамчибек Ташиев Оқбура дарёси бўйида қурилган ноқонуний иморатлар, кўприклар ва дам олиш масканлари бузиб ташланишини айтди. Шунингдек, ноқонуний қурилишга рухсат берган мансабдор шахслар жавобгарликка тортилиши ҳақида огоҳлантирган.
14 июль куни Ўшда кузатилган шиддатли жала туфайли Оқбура дарёси қирғоғидан тошиб чиққан, бунинг оқибатида шаҳар марказий бозори ва дарё қирғоғидаги объектлар сув остида қолган эди.