Украина президенти ўз сўзида янги ракетани мамлакат тарихидаги илк ракета эканини урғулади. У ракета синовига оид маълумотни очиқлаш-очиқламаслик юзасидан иккиланганини яширмади.
“Бу ҳақда гапиришга эрта, деб ўйладим. Бу ҳақда гапиришни истадим, чунки мудофаа корхоналарида 24/7 тартибида ишлаётган одамлар меҳнатини жамиятимиз муносиб баҳолаши керак”, деди Зеленский.
2023 йил сентябрида Украина узоқ масофага учадиган янги ракета синовдан ўтказилаётгани ҳақида билдирган. Мамлакат Миллий хавфсизлик ва мудофаа кенгаши котиби Алексей Данилов ўшанда ракетанинг учирилиши видеосини ижтимоий тармоқлардаги ўз саҳифалари орқали ёйинлаган. Бу видео Украинадаги ракета жиҳозларини ишлаб чиқарувчи етакчи корхона бўлмиш “Луч” конструкторлик бюроси томонидан ҳам ёйинланган.
Ўшанда, тахминларга кўра, гап “Нептун” қанотли ракетаси модификацияси ҳақида борган эди. Мазкур ракета 2000-йиллар бошидан буён доналаб ишлаб чиқарилмоқда, Киев бу ракеталардан Россия ҳужумларини қайтаришда фойдаланиб келади.
Украина СССР қулаганидан кейин баллистик ракеталар ишлаб чиқарган эмас. “Южное” конструкторлик бюроси қаттиқ ёнилғили “Гром” тактик ракета мажмуасини ишлаб чиқариш билан шуғулланган, лойиҳа қисман Саудия Арабистони томонидан молиялаштирилган. 2022 йилдан кейин лойиҳа тақдири ҳақида маълумот берилган эмас.