Қирғизистон президенти Садир Жапаров "Кабар" давлат ахборот агентлигига берган интервьюсида 31 август Мустақиллик кунида концертда иштирок этадиган россиялик санъаткорларнинг келишига изоҳ берди.
"Илгари хориждаги кўпчилик Қирғизистон ҳақида деярли билмасди. Мустақиллик байрами муносабати билан бизни табриклаб, концерт беришаётганларини хурсандчилик билан қабул қилишимиз керак. Маълум бўлишича, улар гонорар олишмайди. Худо ёрлақасин уларни. Албатта, уларни уй-жой ва озиқ-овқат билан таъминлаймиз, меҳмондўстлигимизни кўрсатамиз," - деди Жапаров.
Президент, шунингдек, россиялик санъаткорларнинг келишини "узоқни кўрмайдиган сиёсатчилар" ва уларнинг тарафдорлари танқид қилаётганини таъкидлади.
"Эсингиздами, бизни ҳеч ким танимайди, ҳеч ким юртимизга келишни хоҳламайди, деган замонлар бўлган? Ҳозир вазият ўзгарди: барча мамлакатлар Қирғизистон билан ҳисоблаша бошлади. Келгуси йилда жаҳон давлатлари президентларининг ташрифи кутилмоқда. Илгари ҳатто қўшниларимиз ҳам бизни жиддий қабул қилишмасди. Ҳозир, худога шукур, ҳамма нарса ўзгарди. Провокаторларга эътибор берманг. Кимгадир ёқмаса, эшитмасин. Биз ҳеч кимни мажбур қилмаймиз," - деди у.
Аввалроқ Қирғизистон маданият вазири Олтинбек Мақсутов ҳам санъаткорларнинг келишини изоҳлар экан, "уларни эшитишни истамаганлар шунчаки келмаслиги мумкин," деган эди.
Президент ва маданият вазири ижтимоий тармоқ фойдаланувчилари Қирғизистон Мустақиллик кунида россиялик санъаткорларнинг келишига норозилик билдира бошлаганидан кейин изоҳ берди. Танқидчилар россияликлар ўрнига маҳаллий санъаткорлар чиқишини ёқлаган эди.
31 август куни Ала-Тоо майдонида россиялик хонандалар Стас Михайлов, Филипп Киркоров, Люся Чеботина, шунингдек, швед хонандаси Боссон ва италиялик қўшиқчи Инг-Грид чиқиш қилади.
Садир Жапаров Қирғизистон Мустақиллик кунига россиялик санъаткорларнинг келишига изоҳ берди
Президент россиялик санъаткорларнинг келишини "узоқни кўрмайдиган сиёсатчилар" ва уларнинг тарафдорлари танқид қилаётганини айтган.