Қирғизистон Вазирлар Маҳкамаси раҳбари Оқилбек Жапаров 29 август куни мамлакат фуқаролари учун пенсияларни 2024 йил 1 октябрдан индексация қилиш тўғрисидаги қарорни имзолади. Тегишли ҳужжат "Токтом" порталида эълон қилинди.
Қарорга кўра, Ижтимоий жамғармага 1 октябрдан бошлаб пенсияларнинг суғурта қисми миқдорларини индексация қилиш коэффициентини 1,18 миқдорида, бироқ 1000 сўмдан кам бўлмаган миқдорда индексация қилиш топширилди.
Бундан ташқари, Ижтимоий жамғармага пенсияларнинг умумий миқдорини минимал даражага, яъни 6900 сўмгача етказишни ҳисобга олган ҳолда пенсиянинг базавий қисмини барча устамалар билан бирга 6900 сўмдан кам бўлган пенсияларни ҳам индексация қилиш топширилди.
Президент Садир Жапаров 2024 йил 1 октябрдан бошлаб Ижтимоий жамғарма томонидан тайинланадиган барча пенсиялар камида 6800 сўмни ташкил этишини маълум қилиб, май ойи охирида пенсиялар ошишини эълон қилди. Унинг таъкидлашича, бу Қирғизистон Конституциясида назарда тутилган бўлиб, унга кўра пенсия ва нафақалар яшаш минимумидан паст бўлмаслиги керак.
Қирғизистон Конституциясида "пенсия, ижтимоий нафақа ва бошқа ижтимоий ёрдам қонун билан белгиланган яшаш минимумидан паст бўлмаган турмуш даражасини таъминлайди" дейилган.
Бу норма 2021 йилда қабул қилинган. 2022 йил ноябрида Вазирлар Маҳкамаси раиси Оқилбек Жапаров бу нормани бажариш қйинлигини айтган эди. "Биз бу норма ишламайди, деб айтган эдик, лекин шунга қарамай, халқ Конституцияни айнан шу таҳрирда қўллаб-қувватлагани учун биз ҳозир бунинг устида ишлаяпмиз," - деганди у ўшанда.
Миллий статистика қўмитаси маълумотларига кўра, Қирғизистонда 2024 йилнинг иккинчи чораги якунлари бўйича яшаш минимуми 7827 сўмни ташкил этган.
Қирғизистон Конституциясида "пенсия, ижтимоий нафақа ва бошқа ижтимоий ёрдам қонун билан белгиланган яшаш минимумидан паст бўлмаган турмуш даражасини таъминлайди" дейилган.