Садир Жапаров 11 сентябрь куни ўзбекистонлик мураббий Акмал Ҳасанов билан учрашди ва унга қирғизистонлик боксчи Мунарбек Сейитбек ўғлининг Олимпиадасидаги ғалабасига қўшган ҳиссаси учун миннатдорчилик рамзи сифатида автомобиль совға қилди. Бу ҳақда Қирғизистон президенти матбуот хизмати хабар берди.
Қирғизистон президенти Акмал Ҳасанов билан суҳбатда унинг бу ёрдами Қирғизистон ва Ўзбекистон халқларининг дўстлиги ва бирлигини улуғлаганини айтди.
"Бутун дунё Марказий Осиё халқлари бирдамлик ва дўстлик ришталарини намойиш этиб, бир-бирини қўллаб-қувватлаётганини кўрди. Бирлигимиз янада мустаҳкам бўлишини истайман," - деди Садир Жапаров.
Мунарбек Сейитбек ўғли Олимпиада олтин медали учун курашган биринчи қирғизистонлик ўлароқ тарихга кирди.
Бунда эса унга Ўзбекистон бокс терма жамоачи мураббийи Акмал Ҳасанов кўмаклашди: Сейитбек ўғлининг ўз мураббийи номаълум сабабларга кўра Қирғизистон олимпия делегацияси таркибига кирмай қолгани учун Ҳасанов финалга қадар барча жангларда унга секундантлик қилди.
Манфаатлар тўқнашуви бўлмаслиги учун ўзбекистонлик мураббий, табиийки, финалда Сейитбек ўғли билан ишламади, лекин жанг олдидан унга чин кўнгилдан омад тилаб, ўзбекча чопон ва дўппи ҳадя қилди.
“Мунарбек, финалга чиққанингдан фахрланаман. Қирғизистон халқи шундай натижаларга эришаётганидан хурсандман. Ким кучли бўлса, ғалаба ўшаники бўлсин!” деди унга Ҳасанов.
Садир Жапаров Олимпиадада қирғизистонлик боксчига кўмаклашган ўзбекистонлик мураббийга автомобиль совға қилди
Сейитбек ўғлининг ўз мураббийи номаълум сабабларга кўра Қирғизистон олимпия делегацияси таркибига кирмай қолгани учун Ҳасанов финалга қадар барча жангларда унга секундантлик қилди.