Қозоғистон Ҳарбий суди “хизмат ваколатидан чиқиб кетганликда" айбланаётган Мудофаа вазирлигининг ходими Арман Жуманга нисбатан биринчи суд инстанцияси чиқарган оқлов ҳукмини бекор қилди. Арман Жуман 2022 йилдаги январь воқеалари пайтида тўрт ёшли Айкоркем Мелдеханнинг ўлимида айбдор деб топилган эди.
У етти йилга озодликдан маҳрум этилди, деб ёзади Озодлик радиосининг қозоқ хизмати.
Айкоремнинг отаси Айдос Мелдехан ҳукмдан норози эканлигини айтди. "Арман Жуманни хизмат ваколатидан чиқиб кетиш бўйича эмас, қотиллик моддаси бўйича жазолаш керак эди. Етти йил нима бўлипти, икки йилда чиқиб келади", деди у Озодлик радиосига берган изоҳида.
Ўз навбатида, маҳкумнинг адвокати Оксана Мусохранова ҳукм устидан кассация шикоятини беришини айтди.
Айкоркем Мелдеҳан оиласи машинада 2022 йилнинг 7 январь куни Олмаотада шаҳар ҳокимлигига яқинлашаётганда ўққа тутилган. Машинага 20 та ўқ теккан. Шулардан бири қизнинг бошига тегиб, у воқеа жойида вафот этган. Машинада унинг катта акалари ва опачаси ҳам бўлган, у ҳам жароҳат олган. Баллистик тадқиқотлар машинани ҳокимиятда жойлашиб олган ҳарбийлар отиб ташлаганини тасдиқлаган. Ҳукумат айнан кимлар ўқ узганини аниқлаш имконсиз эканлигини айтиб, жамоатчилик босими остида фақатгина бўлинма командири Арман Жуманни рамзий жавобгарликка тортишга рози бўлган. Унга нисбатан аввал "Қотиллик" бўйича очилган жиноий иш кейинчалик "хизмат ваколатидан чиқиб кетиш"га енгиллаштирилган.
Мелдеханлар оиласи Миллий хавфсизлик қўмитаси ходимларининг таҳдидларидан сўнг Қозоғистонни тарк этишга мажбур бўлди. Мавзуни расмийлар бости-бости қилишга уринаётган бир пайтда қизнинг отаси Айкоркемнинг ўлимида айбдорларни жазолаш учун тиришиб-тортишиб юргани учун МХҚ уни таъқибга олган.
Қизнинг отаси хавфсизлик нуқтаи назаридан ҳозирда улар қаерда эканлигини айтмаган.
Айкоркем ҳалок бўлган 7 январь куни президент Қосим-Жомарт Тоқаев армия ва полицияга огоҳлантирмасдан ўқ узишни буюрган. Қозоғистонда "қантар воқеалари" деб тарихга кирган оммавий тартибсизликлар пайтида, Бош прокуратура маълумотларига кўра, 238 киши ҳалок бўлган, шулардан 20 нафари "тасодифий ўқдан".