Байденнинг ўз сайлов кампанияси ҳомийлари билан душанба кунги учрашувида айтган бу сўзларини Reuters ахборот агентлиги иқтибос ўлароқ келтирган.
“Икки йил аввал Колорадо дарёси қуриб қолиши мумкинлигидан ташвишда эканимни айтганимда ҳамма менга телбага қарагандай қараган эди. Путин тактик ядровий қуролдан фойдаланиши мумкинлигидан хавотирда эканимни айтганимда ҳам менга шундай назар билан қарашган. Аммо бу ҳақиқатан ҳам шундай”, деган Байден.
Сўнгги йилда АҚШ жануби-шарқий ҳудуди учун ичимлик сувининг асосий манбаи бўлган Колорадо дарёси қуриши билан боғлиқ жараён кескин кучайиб кетган. Бу иқлим ўзгариши билан боғлиқ. Бу йил АҚШнинг бир неча штати сув истеъмолини камайтириш бўйича мисли кўрилмаган чораларга қўл урган.
17 июнь куни Байден Россия томонидан Беларусга тактик ядро қуроли жойлаштирилишини кескин танқид қилиб, буни “мутлақо масъулиятсиз” қадам деб атаган. Россия ТИВ ядро қуроли Беларусга “муддатсиз” жойлаштирилганини билдирган.
Байден Россия ядро қуролидан фойдаланиши ва унинг қаерда қўлланилиши мумкинлигига оид хулосага қайси маълумотларга таянган ҳолда келганига аниқлик киритган эмас. Аввалроқ америкалик ҳарбийлар ва Оқ уй маъмурияти вакиллари Россиянинг ядровий зарбага ҳозирланаётгани белгисини кўрмаётганларини ва шундан келиб чиққан ҳолда, АҚШ ядровий кучлари жанговарлик ҳолатини ўзгартирмоқчи эмасликларини бир неча бор билдиришган.
Ғарбдаги бир қатор таҳлилчилар Россия фронтда муваффақиятсизликка учраган тақдирда Украинага қарши тактик қуролдан фойдаланиши мумкинлигидан хавотир изҳор қилишган. Ўтган ҳафтада таниқли кремлпараст сиёсатшунос Сергей Карагановнинг Польшага ёхуд Марказий ё Шарқий Европада жойлашган бошқа бир НАТО ўлкасига ядровий зарба беришга чақираёзган мақоласи катта шов-шувга сабаб бўлган эди.