АҚШ барлау мәліметіне қарағанда, Солтүстік Корея оқ-дәрілер Таяу Шығыс және Солтүстік Африка өлкелеріне кетіп жатқандай түр көрсетуге әрекет еткенімен, шын мәнінде олар Ресейге бағытталған.
Бірақ Пхеньян Ресейге қанша оқ-дәрі жөнелткені жөнінде мәлімет жоқ. Алайда АҚШ-тың Ұлттық қауіпсіздік кеңесінің өкілі Джон Кирби Вашингтон Солтүстік Кореядан Ресейге қару-жарақ жеткізу мүмкіндігін бақылап жатқанын жеткізді.
Әзірге Ресей мен Солтүстік Корея өкілдері бұл мәлімет бойынша ешқандай пікір білдірмеді.
Қыркүйек айында АҚШ-тың барлау қызметі Ресей Солтүстік Кореядан артиллериялық снарядтарды және зымырандар сатып алып жатқанын мәлімдеген.
Осыған дейін Ресей Ираннан "Шахед-136" деп аталатын жанкешті-дрондарды алып жатқаны белгілі болды. Бірақ Ресей қорғаныс министрлігі мен Иран ресми түрде мұны теріске шығарған.
Солтүстік Корея әлемдегі ең ірі артеллериялық топтардың біріне ие. Өлкедегі қару-жарақтың көбі советтік калибрдегі снарядтарды қолданады. Демек олар Ресейдің артиллериясына да сәйкес келеді.