Бұның алдында қосымшаны Apple және Google компанияларында сатуға тыйым салатын құжатты Конгрестегі Сенат пен Өкілдер палатасы мақұлдаған.
ByteDance компаниясы тоғыз айдың көлемінде өзінің америкалық бизнесін басқа бір қожайынға сатпаса, платформаға тыйым салынады. Келісім жүріп жатқаны анықталған жағдайда, мерзім тағы үш айға созылуы мүмкін.
Шектеуді қолдаушылардың мәлімдеуінше, TikTok АҚШ ұлттық қауіпсіздігіне қауіп төндіріп тұр. Олардың пікірінше, Қытай үкіметі арнайы қызмет туралы заңдарын ByteDance компаниясына қарсы қолданып, TikTok пайдаланатын АҚШ азаматтарының жеке мәліметтерін ҚХР билігіне беруге мәжбүрлеуі мүмкін.
Түрлі дереккөздер ByteDance компаниясының Қытай үкіметімен байланысы барын айтқан. ByteDance АҚШ және басқа да елдердің тергеуіне бірнеше мәрте іліккен.
170 миллионға жуық америкалық қолданатын TikTok әлеуметтік желісінің мәлімдеуінше, компания АҚШ-тағы қолданушылар туралы ақпаратты ешкімге бермеген, сонымен бірге Қытай үкіметінен мұндай өтініш алмаған.
Қауіпті сейілту мақсатында компания Oracle корпорациясымен келісім-шартқа отырып, 2020 жылдан бастап АҚШ-тағы қолданушылар мәліметтерін сонда сақтап жүрген.