Бу ҳақда агентлик раҳбари Рафаэл Гросси Твиттерда маълум қилди. У хабарга ўзи ва агентликнинг яна 13 нафар мутахассиси тасвирланган фотосуратни ҳам илова қилган.
АЭХА веб-сайтининг хабар беришича, агентлик миссияси Запороже атом электр станцияси объектларига етказилган жисмоний зарарни баҳолайди, асосий ва захира хавфсизлик тизимлари ишлаётганлигини аниқлайди, ходимларнинг меҳнат шароитларини баҳолайди ҳамда хавфсизликни таъминлаш бўйича шошилинч чоралар кўради.
The New York Times томонидан кўрилган гуруҳ аъзолари рўйхатида АЭХА бош директори Рафаэл Гросси ва 13 нафар эксперт, асосан "нейтрал мамлакатлар"дан. Шу билан бирга, миссия таркибига Украина дўстона деб ҳисоблайдиган Полша ва Литва, шунингдек, Россия билан дўстона муносабатларга эга деб ҳисобланган Сербия ва Хитойдан мутахассислар ҳам кирди, деб ёзади газета. Делегация таркибида на АҚШ ва на Буюк Британия вакиллари бор.
Запороже АЭС Европадаги энг йирик атом электр станциясидир. Россия қўшинлари станцияни Украинага бостириб киришдан кўп ўтмай, 2022 йил март ойида эгаллаб олди. Ўшандан бери Киев ва Москва бир-бирини атом электр станцияси яқинидаги ҳудудни ўққа тутганликда бир неча бор айблаб келади. Август ойи бошида АЭХА Запороже АЭСда хавфсизлик протоколлари оммавий равишда бузилганини айтди.
Оммавий ахборот воситалари, шунингдек, станция ҳудудида Россиянинг хусусий ҳарбий компанияси жангчилари кўнгиллилар, тадбиркорлар ва оддий маҳаллий аҳолини мажбуран ушлаб, қийноққа солаётган ҳарбий база борлиги ҳақида хабар бермоқда.
БМТ Россия ва Украинани станция атрофида қуролсизлантирилган ҳудуд яратишга чақирди. Украина ҳам худди шундай мурожаат билан чиқди, мурожаатни бир қанча давлатлар, жумладан АҚШ ва Европа Иттифоқи давлатлари қўллаб-қувватлади. Москванинг даъво қилишича, рус ҳарбийлари атом электр станциясига фақат уруш пайтида уни ҳимоя қилиш учун жойлаштирилган.